Оҕолор нэһилиэктэригэр субуотунньуктаатылар

Сэбиэскэй кэм саҕана учууталлар оскуола оҕолоругар төрөөбүт нэһилиэктэрин иһин-таһын хомуйууга анал субуотунньуктары  тэрийэллэрэ. 

Хомойуох иһин, билигин ол үтүө тэрээһин умнуллубута ыраатта. Арай быйылгыттан оҕону үлэнэн иитиигэ болҕомто ууруллан, ол үтүө хамсааһын сөргүтүллэр ини диэн эрэл баар.

Соторутааҕыта Нам улууһун Партизаныгар  оскуола оҕолоро нэһилиэктэрин былаһааккаларын хомуйдулар, кырдьаҕастарга күүс-көмө буоллулар. Бу туһунан баһылык солбуйааччыта Полина Скрябина маннык иһитиннэрэр:

— Кыстыкка  бэлэмнээн оскуола оҕолоро былаһааккаларга субуотунньуктаатылар, искибиэрдэри ыраастаатылар. Маныаха тимуровскай хамаандалар хамсааһыннарын көмөлөрө сүҥкэн. 

Кинилэр аҕам  саастаах дьоҥҥо ууларын тастылар, мастарын саһааннаатылар, тиэргэннэрин ыраастаатылар. 

Кэрэхсэбиллээҕэ баар, оҕолор кырдьаҕастары болҕомтоҕо ылыылара үгэскэ кубулуйда.

Хас биирдии кылаас сыһыарыллыбыт кырдьаҕастаах.

Инньэ гынан бу күннэргэ ытык дьоммут оҕолортон аккырыыкка  маанытын туттулар, үлэ арааһын үлэлэттилэр.

Ити курдук, нэһилиэк аайы кырдьаҕастар бэйэлэрэ көрдөһөллөрүн кэтэспэккэ, көрө-истэ сылдьан, көмөлөһөллөрө, өйөбүл оҥороллоро хайҕаллаах суол.