Оҕолор оҥоһуктарын сэҥээрдилэр

Горнай улууһугар Атамай агрооскуолата таһаарыылаахтык үлэлиир.

Биисинэс-инкубатордарга дьарыктанар үөрэнээччилэр бэлэмнээбит, оҥорбут оҥоһуктара кэрэхсэбили ылла.

Ол курдук, Галя Стручкова, Айтаана Павлова, Ильза Иванова, Эрсан Павлов, Агнесса Габышева бүтүн өрөспүүбүлүкэтээҕи оскуолалар икки ардыларыгар ыытыллыбыт биисинэс-инкубатордар күрэстэригэр үһүс миэстэ буоллулар.

Оҕолор бэйэлэрэ оҥорон атыыга таһаарбыт бородууксуйалара: гипсэттэн киэргэллэрэ, бэйэ олордубут оҕуруотуттан чипсы арааһа, хатарыллыбыт пастила, чэй, бэйэлэрэ оҥорбут сакалааттара, биһирэбили ылбыт микрозелень, сэлиэһинэйтэн битэмиин, «Атамай бэлэҕэ» диэн бренд-бокс дьүүллүүр сүбэ уонна атыылаһааччы биһирэбилин ылла.

«Бэйэлэрэ дьарыктаах» оҕолор икки ардыларыгар Айтаана Павлова сакалаата үһүс миэстэни ылла, кубогынан бэлиэтэннэ.

Кэскиллээҕи түстүүр биисинэс-былаһаакка резиденнэригэр, уһуйааччыларыгар, партнердарга эҕэрдэбитин уонна улахан махталбытын тиэрдэбит.

Татьяна Павлова

Хаартыскалар Татьяна Павлова тиксэриилэрэ