Оҕолор «Орлята России» кэккэлэригэр киирдилэр

Дьокуускай куорат 13-с №-дээх оскуолатыгар 1-кы кылаас үөрэнээччилэрин «Орлята России» хамсааһын кэккэтигэр киллэрии үөрүүлээх тэрээһинэ буолан ааста.

Бу – «Бастакылар хамсааһыннарын» Арассыыйатааҕы оҕо-ыччат тэрилтэтин бастакы сүһүөҕэ буолар. Үөрүүлээх тэрээһин Арассыыйа Федерациятын уонна Саха Өрөспүүбүлүкэтин өрөгөй ырыаларынан саҕаланна. Кырачааннары бу бэлиэ түгэнинэн оскуола дириэктэрэ Иосиф Слепцов эҕэрдэлээн тыл эттэ. Ол кэнниттэн оҕолор орленоктар тустарынан кэрэхсэбиллээх номоҕу иһиттилэр. Салгыы оҕолор саҥа тэрилтэ сокуоннарын кытта билистилэр, дойдуларын таптыырга, үчүгэйдик үөрэнэргэ, үтүөнү оҥорорго, тылларын тутарга, доҕордоһууну сыаналыырга уонна сиэрдээх буоларга андаҕар эттилэр.

Оскуола дириэктэрэ И.М. Слепцов, дириэктэри иитии үлэтигэр солбуйааччы А.П. Фролова, дириэктэр сүбэһиттэрэ Т.А. Винокурова, Т.Ю. Макарова уонна «Бастакылар хамсааһыннарын» бастакы сүһүөҕүн активистара үөрүүлээх быһыыга-майгыга хаалтыстары баайан, бу холбоһукка киирбиттэрин бэлиэтээтилэр. Ону таһынан, атах таҥаһын укта сылдьарга аналлаах «Орлята России» суруктаах мөһөөччүктэри бэлэхтээтилэр.

Орленок буолуу – көннөрү хамсааһыҥҥа киирии эрэ буолбатах, бастатан туран, эппиэтинэс. Бу инники күөҥҥэ сылдьар, Ийэ дойдуга тапталы, үлэҕэ дьулууру уонна билиигэ-көрүүгэ тардыһыыны иитэр диэн суолталаах.

«Бастакы кылаас үөрэнээччилэрин бу бэлиэ түгэнинэн эҕэрдэлиибит уонна үөрэхтэригэр ситиһиилэри, саҥа саҕахтары баҕарабыт! Биһиги «Орлята России» ааты чиэстээхтик толоруохтара, кэлэр өттүгэр оскуолабыт уонна дойдубут киэн туттар дьоно буолуохтара диэн эрэнэбит! Орленоктар холбоһуктара кинилэргэ дьоллоох эйгэ буоллун!», — диэн учууталлар эҕэрдэлэрин эттилэр.