Оҕолор пилота суох көтөр аппарааты көтүтэ, салайа үөрэнэллэр

Байыаннай дьайыы бэтэрээнэ оҕолору пилота суох көтөр аппарааты ыытарга, салайарга үөрэтэр. Кини «Аҕа дойдуну көмүскээччилэр» пуонда филиалын көмөтүнэн үлэнэн хааччыллыбыт. Оскуола орто уонна үрдүкү кылааһын оҕолоругар инструктордыыр.

«Пилота суох көтөр аппарааты салайарга оҕолору үөрэтэбин. Бу тэриллэр байыаннай эрэ сыалга-сорукка туттуллар буолбатахтар, элбэх эйгэҕэ туһаныллаллар. Оҕолор дьарыкка оҥорорго, программалыырга, ыытарга үөрэнэллэр. Маннык үөрэммиттэрэ кинилэргэ туһалаах буоларыгар эрэнэбин», — диэн этэр Анатолий.

Анатолий Томпо улууһуттан төрүттээх. Дойдутугар кини оҕолору, ыччаты патриотическай иитиигэ көмөлөһөр, көхтөөхтүк кыттар.

Кини байыаннай дьайыыга «Боотур» добровольческай этэрээккэ сылдьыбыт. «Хорсунун иһин» II истиэпэнинэн, «За доблесть» II истиэпэнинэн ЛНӨ наҕараадаламмыт. Анатолий бааһыран демобилизацияламмыт.

Дьиэтигэр кэлэн баран, кини «Аҕа дойдуну көмүскээччилэр» пуонда филиалыгар Нина Стенинаҕа үлэ көрдөөн ыйыталаспыт. Онуоха Нина Стенина Томпо улууһугар нэһилиэнньэ дьарыктаах буолуутун киинин кытары сибээстэспит. Ол кэнниттэн Анатолийга инструктордыырга эппиттэр.

Санатан эттэххэ, СӨ Ил Дархана Айсен Николаев Ил Түмэҥҥэ Анал этиитигэр байыаннай дьайыы кыттыылаахтарыгар социальнай адаптацияны баралларыгар көмөлөһүү биир сүрүн сыалынан-соругунан буоларын эппитэ.

«Биһиги кинилэргэ көмөлөһүөхтээхпит, өйөбүл буолуохтаахпыт. Хас биирдии буойун толору реабилитацияны барарын хааччыйыахтаахпыт. Үлэлээх буолуу боппуруоһун быһаарыахтаахпыт. Ирдэнэр идэҕэ үөрэнэригэр кыаҕы биэриэхтээхпит. Өрөспүүбүлүкэ Бырабыыталыстыбатыгар, улуустар баһылыктарыгар байыаннай сулууспалаахтар бары хайысханан социальнай адаптацияны баралларыгар үлэни күүһүрдэргитигэр соруйабын», — диэн эппитэ.

СӨ Ил Дарханын уонна Бырабыыталыстыбатын пресс-сулууспата