Оҕолор сайыҥҥы лааҕырдарга сынньаныахтара

Байыаннай дьайыы кыттыылаахтарын оҕолоро Дьокуускайга лааҕырдарга босхо сынньаныахтара.

Байыаннай дьайыы кыттыылаахтарын — байыаннай сулууспалаахтар оҕолоро өрөспүүбүлүкэ иһигэр сайыҥҥы лааҕырдарга сынньанарга босхо путевканан хааччыллаллар. Бу туһунан Дьокуускай куорат дьаһалтатын үөрэххэ управлениетын начаалынньыгын солбуйааччы Егор Охлопков иһитиннэрэр.

Ыам ыйын 1 күнүттэн оҕону чэбдигирдэр лааҕырдарга сайабылыанньаны биэрии саҕаламмыт. Быйыл сурутуу биир кэлим Судаарыстыбаннай өҥө (Госуслуги) порталыгар ыытыллар. Манна оҕолор куорат таһынааҕы стационарнай, күнүскү, үлэ уонна сынньалаҥ, «Дьокуускай куорат» куорат уокуругун лааҕырдарыгар сынньаныахтарын сөп.

Төрөппүттэр (сокуонунан бэрэстэбиитэллэр) оҕолорун лааҕырга gosuslugi.ru порталынан, ону таһынан, үөрэх тэрилтэтигэр тус бэйэлэрэ сайабылыанньа суруйуохтарын сөп диэн иһитиннэрэллэр.

«Билиҥҥи туругунан үөрэх управлениетыгар байыаннай дьайыы кыттыылаахтарын дьиэ кэргэттэриттэн 770 сайабылыанньа киирдэ. 250  оҕо СӨ Үөрэх уонна наука министиэристибэтин «Энергетик» лааҕырыгар, 520 оҕо «Спутник», «Каландаришвили», «Радуга», «Бинго» уонна «Родничок» сынньалаҥ уонна оҕону чэбдигирдэр лааҕырдарга сылдьыахтара», — диэн иһитиннэрэр Егор Охлопков.

Сайыҥҥы кэм устатыгар Дьокуускай куорат сиригэр-уотугар 49 лааҕыр үлэлиир. Ол иһигэр, оҕолор күнүһүн сылдьар 40 лааҕырдара, 5 ДЗСОЛ («Спутник», «Радуга», «Каландаришвили», «Бинго», «Родничок»), 2 үлэ уонна сынньалаҥ, 2 палаточнай лааҕыр үлэлииллэр.

Ыйытыылаахтар 8 (4112) 40-03-45 төлөпүөнүнэн эрийэн чопчулаһыаххытын сөп.

Дьокуускай куорат дьаһалтатын пресс-сулууспата