Оҕолорго аналлаах “Тооку” ханаал сарсыҥҥыттан үлэтин саҕалыыр

Саха сирин устуоруйатыгар киирэр бэлиэ түгэн буолаары турар – оҕолорго аналлаах “Тооку” ханаал үлэтин саҕалыаҕа.

Саха сиригэр ыытыллар Бүтүн Арассыыйатааҕы Креативнай нэдиэлэ чэрчитинэн уонна Оҕо көмүскэлин күнүн көрсө ыам ыйын 31 күнүгэр киэһэ 19 ч. оҕолорго аналлаах “Тооку” ханаал үлэтин саҕалыаҕа.

“Саха” НКИХ кылаабынай эрэдээктэрэ Анна Кириллина: “Оҕолорго аналлаах туспа ханаал туһунан кэпсэтии барбыта ыраатта, эрдэ “Мамонт” ханаалтан 6 чаас көрүллэрэ. Ил Дархан Айсен Николаев 2024 сылы Оҕо саас сылынан биллэрбитэ уонна оҕо ханаала баар буолуохтаах диэн эппитэ.

Оҕолорго аналлаах ханаалбыт “Тооку” диэн ааттаах. Генеральнай дириэктэрбит Олег Марков этэринэн, Тооку  номнуо оҕо-аймах, дьон-сэргэ биһирээбит “Тооку” диэн хас да сиэрийэлээх ойуулукпут дьоруойа буолар. Манна даҕатан эттэххэ, оҕолор, төрөппүттэр көрдөһүүлэринэн “Тооку” өссө уон сиэрийэтин уста сылдьабыт, былырыын күһүн анимация бэстибээлин тэрийбиппит. Ол курдук киэҥ сэҥээриини ылбыт, норуот тапталлаах дьоруойунан буолбут ойуулукпут аатынан ханаалбыт ааттанна.

Онон оҕолор үөрүүлэригэр “Тооку” ханаал суукканы эргиччи үлэлиэҕэ. Манна Арассыыйа тылбаастаммыт, бэйэбит оҥорбут ойуулуктарбыт киириэхтэрэ, иитэр-сайыннарар биэриилэри көрдөрүөхпүт. Инникитин атын бырайыактары эмиэ толкуйдуохпут” – диэн санаатын эттэ.

“Тооку” сахалыы, нууччалыы уонна хотугу төрүт олохтоох омуктар тылларынан барыаҕа.

Сибээс оператордара /кабельнай, аналоговай, спутниковай/: Ростелеком iptv wink  24-й канал, Лайфстрим iptv Смотрешка 316-й канал, Мтс iptv 551-й канал, Билайн кабельный ТВ 28-я кнопка.