Оҕолорго киэптээбит дьоҥҥо холуобунай дьыала тэрилиннэ

Таатта улууһун Харбалаах сэлиэнньэтин икки олохтооҕор холуобунай дьыала тэрилиннэ. Кинилэр быһаҕынан анньыахпыт диэн куттаан туран, күлүгээннээбиттэрин иһин, холуобунай дьыалаҕа тардылыннылар. Бу туһунан Силиэстийэлиир кэмитиэт Саха сиринээҕи силиэстийэлиир управлениета иһитиннэрэр.

Быһылаан балаҕан ыйын 14 күнүгэр «Харбалаах» суолга түүн буолбут.  Уолаттар матасыыкылларын өрөмүөннүү сырыттахтарына, 23 уонна 27 саастаах икки итирик дьон тиийэн кэлбиттэр.

Бу дьон сокуоннай саастарын туола илик оҕолорго быһаҕынан далбаатана-далбаатана, куттаан киирэн барбыттар.  Туох да төрүөтэ суох эбит. Биир тылынан эттэххэ, оҕолорго киэптээбиттэр. Уолаттар чахчы быһахтыахтара диэн куттанан, матасыыкылларын быраҕан баран, куоппуттар.

Билигин буруйданааччылар хаайылыннылар. Холуобунай дьыаланы силиэстийэлээһин салҕанар. Бу дьон күлүгээннии быһыылара РФ Холуобунай кодексын 213 ыстатыйатын 2 чааһыгар ыйыллар буруйу оҥорууга сөп түбэһэр.