Оҕолорго кырыктаах ньээҥкэни үҥүстүлэр

Бу күннэргэ социальнай ситимҥэ оҕо көрө кэлбит ньээҥкэ икки кыра саастаах оҕону мөҕөрүн-этэрин, илиитинэн киирэрин туһунан видео киэҥник тарҕанна.

Оҕолор ийэлэрэ үлэлиир буолан иккилээх уонна түөртээх оҕолоругар биллэриинэн көрөн ньээҥкэни үлэҕэ ылбыт. Ньээҥкэ иккилии хоно-хоно кэлэн оҕо көрсөн көмөлөһөр эбит. Ханнык эрэ түгэҥҥэ ийэ киһи Светлана иһигэр саарбахтыы санаабыт уонна дьиэтигэр кистэлэҥ видеокамера туруортарбыт. Тоҕо диэтэххэ, кини уорбалаабытынан, ньээҥкэ оҕолорго үчүгэйэ суох сыһыаннаах буолуон сөп эбит.

Оҕолор ньээҥкэни кытта тохсунньу 9 күнүгэр аан бастакыларын көрсүбүттэр. Бастакы күннэргэ ньээҥкэ оҕолору кытта оонньуурун, хайдах сылдьалларын хаартыскаҕа түһэрэн ыытар эбит. Кэлин оннук гыммат буолбут. Кини оҕолору уопсайа аҕыс күн устата көрбүт. Ити аҕыс күн иһигэр оҕолор уйулҕаларыгар охсууну оҥорбут буолуон сөп. Кыра уол эрдэ холкутук горшокка бэйэтэ олорор буоллаҕына, ньээҥкэ кэлиэҕиттэн ыксалыттан ыстааныгар ииктиир буолбут. Оҕолор майгылара уларыйбытын, хаппырыыс уонна ытанньах буолбуттарын ийэ киһи бэлиэтии көрбүт. Дьону кытта түргэнник уопсай тылы булар түөртээх уол ийэтэ ыйыттаҕына тугу да кэпсээбэт буолбут. Кистэлэҥ камера устубутунан, ньээҥкэ ороҥҥо сытан эрэ оҕолорго хаһыытыыр, маатыралыыр уонна илиитинэн киирэр эбит.

Икки оҕолоох ийэ полицияҕа үҥсүү түһэрбит. Ол эрээри кини ньээҥкэ буруйун дакаастыыр уустук буолуо диэн сабаҕалыыр. Оттон социальнай ситимҥэ сорох дьон ийэни буруйдаабыттар. Оҕолорун көрбөккө ньээҥкэҕэ сэлээннээн баран өссө үҥсүһэр диэбиттэр. Ханныгын да иһин оҕолорго кырыктаах сыһыан сиэргэ баппат. Оттон эһиги оҕоҕутун ньээҥкэҕэ эрэниэххит этэ дуо?

Хаартыска — социальнай ситимҥэ тарҕаммыт видеоттан скрин.