Оҕолоргут сыаналарын ханнык сыһыарыынан көрөҕүт?

Эрэгийиэннээҕи электроннай күннүктэргэ киирэргэ төлөбүрдээх сурутууну көрдүүр диэн төрөппүттэр элбэх үҥсэргээһини ыытыыларынан сибээстээн, РФ Үөрэҕиритиин министиэристибэтэ бу курдук иһитиннэрэр.

— “Госуслуги Моя школа” – үөрэнээччилэргэ, төрөппүттэргэ аналлаах табыгастаах, босхо сыһыарыы. Ханнык уруоктар буолалларын, дьиэҕэ үлэлэрин, сыаналарын көрүөххэ, бэйэ сорудахтарын киллэрэн ситэрэн биэриэххэ сөп. Сыһыарыыны номнуо 5 мөл. киһи хачайдаата.

“Госуслуги Моя школа” өҥө дойду 83 субъегын бары оскуолаларын үөрэнээччилэрин хабар.

Сыһыарыыны ким баҕалаах туһаныан сөп. Оскуола ыытар дааннайдара төрөппүт көҥүл биэрдэҕинэ эрэ көстөр, 14 сааһыттан оҕо бэйэтэ сөбүлэҥ биэриэн сөп” – диэн РФ Үөрэҕириитин министиэристибэтин телеграм-ханаалыгар суруйаллар.

«Госуслуги Моя школа» туох үчүгэйдээҕий:

— сыһыарыыны туһаныы иһин төлөбүр ылбат;

— төлөпүөҥҥэ да, көмпүүтэргэ да үчүгэйдик үлэлиир;

— табыгастаах барыйааннардаах – дьиэҕэ үлэни толорууга чек-лист, сыанатын кэтээн көрүү, оҕону хайҕааһын, о.д.а…;

— учуутал биэрбит сорудаҕынан сыыппара контенын бибилэтиэкэтиттэн электроннай матырыйааллар бааллар;

— “Судаарыстыбаннай өҥө” нөҥүө киирии – даннайдар оҕоҕо уонна  төрөппүккэ эрэ көҥүллэнэллэр;

— иһитиннэрии сыһыарыыга хараллыбат – оскуола сибэдиэнньэтэ эрэгийиэннээҕи ситимтэн көстөр.

Аныгы кэмҥэ оҕо үөрэҕин хаамыытын, сыанатын көрөргө араас сыһыарыылар бааллар. Саха сиригэр “Моя школа”, “NetScool” о.д.а. сыһыарыылары туһаллара биллэр. Ол эрээри, бу нэдиэлэҕэ ити ыйыллыбыт бүтэһик сыһыарыы үлэлээбэт буолла.