Оҕолоргутун кытта айаҥҥытын устан 3 мөлүйүөн солкуобайы сүүйүөххүтүн сөп

Оҕолорун илдьэ сылдьан айанныыр дьон «Дальний Восток – Земля приключений» бүтүн Арассыыйатааҕы куонкурус иккис сезонун «Детское путешествие» анал номинацияҕа кыттан 3 мөлүйүөн солкуобайы сүүйүөхтэрин сөп диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

Ахсынньы 30 күнүгэр диэри путешественникдв.рф саайтыгар сайаапка түһэрэн, сүрүн бирииһи – 3 мөл. солк. биир хаһаайынынан буолуоххутун сөп.

Өскөтүн эһиги туристическай похуоттаргытыгар, хайаҕа тахсаргытыгар оҕолоргутун илдьэ сылдьар буоллаххытына, бу туһунан видео устан «Дальний Восток – Земля приключений» куонкуруска кыттар кыахтааххыт.

Саха сиригэр онуоха сөптөөх олус кэрэ сир элбэх – иккилии-үстүү күннээх айаннарга: Өлүөнэ остуолбалара, Буотама үрэх, Күрүлүүр күрүлгэн, Булуус, Туруук Хайа, Тукулаан, о.д.а.

Урбаанньыттар оскуола оҕолоругар 7 саҥа туристическай хайысханы астылар:

— «Ил Эйгэ» дьиэ кэргэн сынньалаҥын комплекса «Юный Патриот» хамаанданан квест-оонньуута (Дьокуускай к.);

— «Орто Дойду» тур-комплекс «Срединный мир «Орто дойду» билиэн-көрүө баҕалаахтарга экскурсията (Хаҥалас улууһа);

— «Атласовтар уһаайбалара» туркомплекс сайыҥҥы оҕо лааҕыра (Дьокуускай к.);

— «Аантур» ХЭУо туроператор «Мир древней Лены» култуурунай-үөрэтэр тура (Хаҥалас улууһа);

— «Кемпинг-тур» ХЭУо «Кэмпэндээйи» туһулуур автотура (Сунтаар улууһа);

— «Четыре сезона» дьиэ кэргэн сынньалаҥын турбазатыгар дьиэ кэргэн уонна оҕо сынньалаҥа (Дьокуускай к.);

— «Чучуна трэвел» туроператор туһулуур уонна култуурунай-үөрэтэр экскурсията (Дьокуускай к.);

Күрэхтэһиигэ уопуттаах айанньыттар эрэ буолбакка, улахан дьону кытта сылдьар оҕолор эмиэ кыттыахтарын сөп, бастакы сезон кыайыылаахтарын ортолоругар идэтийэн устуулар да, төлөпүөнүнэн устуулар да бааллара.

Куонкурус түмүгүнэн, кыайыылаахтар бастыҥ үлэлэрэ өрөспүүбүлүкэ телеханаалларыгар көрдөрүллүөхтэрэ, оттон отчуоттуур иһитиннэриилэр уонна видеолар Уһук Илиҥҥи эрэгийиэннэрин туристическай маршруттарын интерактивнай каарталарыгар эбиллиэхтэрэ.