Оҕолору атаҕастаабыт Майа олохтооҕор холуобунай дьыала тэрилиннэ

Оҕолорго кырыктаах сыһыаннаах Майа олохтооҕор холуобунай дьыала тэриллибит.

Ол курдук эр киһи  9 уонна 15 саастаах оҕолордоох дьахтары кытта олорон, оҕолорго илиитинэн киирэр, кырбыыр эбит. Бу иэдээннээх быһыы туһунан олохтоох участковайга иһиллибит. Сурах чахчытын билээри, кини бэрэбиркэлииргэ санаммыт. Хомойуох иһин, оҕолор  куруук кырыктаах киһиттэн атаҕастана олорбуттар. СӨ силиэстийэлиир управлениета 31 саастаах эр киһиэхэ РФ холуобунай кодексатын 117 ыст 2 ч «г» пуунунан сааһын ситэ илик оҕолору, көмүскэллэрэ суоҕунан туһанан атаҕастааһын иһин холуобунай дьыала тэрийбит. Билиҥҥи туругунан, бу холуобунай дьыала тула силиэстийэ ыытыллар. Эмсэҕэлээбит оҕолор чөлгө түһэрэр кииҥҥэ киллэриллибиттэр, кинилэргэ уйулҕа өттүнэн көмө оҥоһуллар диэн СӨ Силиэстийэлиир кэмитиэтин СУ пресс-сулууспата иһитиннэрэр.