«Оҕолору дьаныардаахтык дьарыктыахха эрэ наада»

Ньурба улууһугар Антоновкаҕа А.И. Пахомов аатынан олимпийскай резервэ өрөспүүбүлүкэтээҕи спортивнай оскуолатын үөрэтэр-дьарыктыыр тэрээһиннэрэ быйыл Ньурбатааҕы отделениеҕа ыытыллар.

Бу тэрээһиннэр спортивнай оскуола араас улуус отделениеларын оҕолорун хабар. «Лааҕар үс сезоннаах», — диэн  Октябрьскай нэһилиэк дьаһалтатын пресс-киинэ суруйар.

Бастакы сезоҥҥа кыра уолаттары олохтоох тириэньэр Михаил Хатылыков уһуйда. Билигин орто саастаахтарга үс тириэньэр үлэлиир. Атырдьах ыйыгар улахан уолаттарга ыытыллыаҕа. Сүрүн болҕомто, биллэн турар, оҕо дьарыгар ууруллар. Маны таһынан култуурунай тэрээһиннэр эмиэ ыытыллаллар. Оҕолор интэринээккэ олороллор, Ньурба остолобуойугар киирэн күҥҥэ үстэ аһыыллар, успуорт саалатыгар, пааркаҕа, Бүлүү өрүс биэрэгэр дьарыктаналлар.

«Иккис сезоҥҥа барыта 40 оҕо сырытта, үксүлэрэ 7-9 кылаас оҕолоро. Ол курдук, 16 оҕо өрөспүүбүлүкэ араас улуустарыттан, 24 оҕо Ньурбаттан уһуйуннулар. Ол иһигэр Ньурбаттан икки кыыс оҕо сырытта. «Үс тириэньэр, биир быраас үлэлиибит, салалтаттан методист баар. Сэргэхсийэн Бүлүү биэрэгэр, Антоновка пааркатыгар эмиэ дьарык ыытабыт, кросстуубут. Сорох күннэргэ буруолаах буолан, ноҕуруусканы хайаан да учуоттаабыппыт», — диэн кэпсиир олохтоох отделение тириэньэрэ Руслан Васильев.

Оҕолор түмэлгэ, киинэ тыйаатырыгар сылдьыбыттар, балыктаабыттар. Сайыҥҥы кэмҥэ маннык эбии дьарыгы кыахтаах оҕо эрэ тулуйар, онон УТМ-ҥа баҕалаах эрэ бары киирбэт эбит. Эбии атын улуустартан спортивнай оскуола отделениеларын тириэньэрдэрэ кэлэн үлэлииллэр.