Оҕолору үөхпүт суоппарга миэрэ ылылынна

ИДьМ пресс-сулууспата иһитиннэрбитинэн, ыам ыйын 1 күнүгэр, Дьокуускайдааҕы полиция отделыгар  13 саастаах оҕо ийэтиттэн сайабылыанньа киирбит.

Саайпытыгар суруйбуппут курдук, бу күннэргэ  14-с №-дээх  маршрут  суоппара төлөпүөннэрин алҕас оптуобус солуонугар хаалларан кэбиспит оҕолору үөхпүт уонна үтүөлээбит. Ол видеота ТГ ханаалларга  киэҥник тарҕаммыта.

Полиция үлэһиттэрэ үҥсүү киирээтин  кытта  38 саастаах  оптуобус суоппарын  полиция  отделыгар аҕалбыттар. Оҕолор сокуоннай бэрэстэбиитэллэрэ баарына быһылааҥҥа түбэспит оҕолортон полиция үлэһиттэрэ эмиэ ыйыталаспыттар. Онно биллибитинэн, муус устар 30 күнүгэр эрдэҕэс саастаах уол дьүөгэлэрин кытта көрсүбүт уонна 14-с №-дээх оптуобуһунан айаннаабыттар. Оптуобустан тахсыыларыгар биир кыыстара төлөпүөнүн  хаалларбытын өйдөөбүт. Уол дьүөгэтин нүөмэригэр эрийбитигэр, төлөпүөнү суоппар ылбыт. Кинилэр «Прометей» түөлбэҕэ көрсүөх буолан болдьоспуттар. Оскуола оҕолоругар 200 солк. харчылаахтар эбит. Оҕолор суоппарга манньатын ол 200 солк. биэрэ сатаабыттар. Ол эрээри суоппар харчыны мыыммыт уонна төлөпүөнү күөлгэ быраҕыах буолан суоһурҕаммыт. Кини оҕолору кытта кэпсэтиини хара маҥнайгыттан быдьар тылынан үөхсэн саҕалаабыт. Онуоха уолчаан кинини маатыранан үөхсүбэтигэр эппит.

Видеоҕа устууну полиция үлэһиттэрэ үөрэппиттэринэн, саастарын ситэ илик оҕолор оптуобус суоппарын үөхпүттэрэ көстүбэтэх. Онон, Арассыыйа Федерациятын административнай быраабы кэһии кодексатын 20.1 ыст.1 ч.  административнай боротокуол толоруллубут. Суоппары административнай дьыалаҕа тутуллубуттары кытта суут уурааҕа тахсыар диэри хаайбыттар.