Оҕону ааҕарга көҕүлүүр кииннэр грант ылыахтара

Төрөөбүт тыллары харыстыыр ​​уонна сайыннарар судаарыстыбаннай бырагыраама чэрчитинэн, 2026 сылтан саҕалаан, муниципальнай бибилэтиэкэлэргэ оҕо төрөөбүт тылынан ааҕыытын көҕүлүүр бастыҥ кииннэргэ граннар бэриллиэхтэрэ. Бу туһунан бырабыыталыстыба бэрэссэдээтэлин солбуйааччы Сергей Местников Тыл сэбиэтин мунньаҕар эттэ. Бу мунньахха бибилэтиэкэрдэр 1 -кы сийиэстэрин түмүгүн таһаардылар. 

1-кы Бибилэтиэкэрдэр сийиэстэрэ Дьокуускайга ахсынньы 2-3 күннэригэр буолбута. Манна 28 муниципальнай тэриллиилэртэн 236 дэлэгээт кыттыбыта.

«Сийиэс төрөөбүт тыллары харыстааһыҥҥа уонна сайыннарыыга сыһыаннаах боппуруостары быһаарыыга бибилэтиэкэлэр күүстэрин туһанарга ыҥырбыта. Бэрэсидьиэн Владимир Путин Арассыыйа Тыл бэлиитикэтин сэбиэтин мунньаҕын кэмигэр баар куорат уонна тыа сирин бибилэтиэкэлэрин иһинэн Оҕо ааҕар кииннэрин тэрийэргэ сорудахтаата», — диэтэ бэрэссэдээтэли солбуйааччы.

Сергей Местников кэлэр сыл бастакы кыбаарталын иһинэн сийиэс быһаарыыларын олоххо киллэриигэ дьаһал былаанын бигэргэтэргэ, муниципальнай оройуоннар бибилэтиэкэлэр 2026 сылга үлэ соруктарын быһааралларыгар сорудахтаата.

Национальнай бибилэтиэкэҕэ Оҕо ааҕар киинин тэрийэргэ, бибилэтиэкэ хомуурунньуктарын төрөөбүт тылларынан бэчээттэнэн хаалларарга, ааҕыыга уонна тыл балаһыанньатыгар мониторины кэҥэтэргэ, ситиһиилээх ньымалары тарҕатарга, оҕолорго ааҕыыны тарҕатар үөрэх бырагыраамаларын олоххо киллэрэргэ, ол иһигэр көрдөрөр-иһитиннэрэр сириэстибэлэр нөҥүө, үлэни тэрийэргэ сорудахтаатылар.

Мунньахха Ил Дархан иһинэн үлэлиир Стратегическай чинчийэр киин ыыппыт «Тыл балаһыанньата 2025 сылга» диэн социологическай ыйытык түмүгүн эмиэ дьүүллэстилэр. Киин дириэктэрэ Игорь Николаев быһаарбытынан, ыйытыкка уопсайа 1400 эппиэттээччи хабылынна.

«Маннык чинчийиилэр тыллары харыстыыр ​​уонна сайыннарар судаарыстыбаннай бырагыраама чэрчитинэн, сыл аайы ыытыллаллар уонна өрөспүүбүлүкэҕэ буола турар тыл балаһыанньатын, уопсай хартыынатын көрдөрөллөр. Хас биирдии тыл сайдар, үүнэр-сайдар кыахтанарыгар баар кыһалҕалары быһаарыы суолталаах», — диэн бэлиэтээтэ Сергей Местников.

Ортотунан, ыйытыыга хоруйдааччылартан 39%-ра бэйэлэрин төрөөбүт тылларынан туйгуннук саҥарабыт дииллэр, 43%-ра үчүгэйдик саҥарабыт диэбиттэр. Төрөөбүт тылын билбэт икки киһиттэн биирдэстэрэ үөрүйэҕин үрдэтэр баҕалааҕын биллэрэр (55%).

Ыйытык түмүгүнэн, нуучча тыла оҕолор ахсааннарын аҥаарыгар  кэпсэтэр тылынан буолар. 27 %-ра дьиэ кэргэттэригэр сахалыы кэпсэтэллэр, оттон үөрэх кыһатыгар — 13% уонна бэйэлэрин саастыылаахтарын кытта кэпсэтиигэ  11%.

Сиһилии: https://www.sakha.gov.ru/news/17375