Оҕону албынныыр сатаммат

Уйулҕа үөрэҕэ.

Доруобуйаны чинчийэр институт учуонайдара үстэриттэн биэстэригэр диэри саастаах 74  оҕону түмэн, улахан суолталаах чинчийии оҥорбуттар.

Бастаан оҕолорго видео көрдөрбүттэр. Онно дьахталлар мээчиктэри көрдөрө-көрдөрө  кэпсэппиттэр. Биирдэстэрэ кырдьыгы эппит, икки дьахтар сымыйалаабыттар. Үстээх оҕолортон: «Ким кырдьыгы, ким сымыйаны эттэ?» — диэн ыйыппыттарыгар, кыайан эппиэттээбэтэхтэр уонна видеоҕа көрбүт дьахталларыгар итэҕэйбиттэр. Оттон 4-5 саастаах оҕолор тута өйдөөбүттэр ким кырдьыгы этэрин, ким сымыйалыырын. Оннооҕор кырдьыгы эппит дьахтарга эрэммит санааларын биллэрбиттэр.

Бу тугу быһаарарый? Оҕо улахан киһи көрөрүн-истэрин, саҥарар кэмигэр сирэйин хайдах туттарын-хаптарын барытын кэтээн көрөр, үөрэтэр уонна кырдьыгы дуу, сымыйаны дуу этэрин тутатына быһаарар. Холобур, төрөппүт оҕотун куруук албынныыр буоллаҕына, ону олох нуорматынан ылыныан сөп.

Саха ыалын халандаарыттан, 2025 с.