Оҕону билимҥэ сыһыарар соруктаах билим кулууптарын тэрийэр туһунан кэпсэттилэр

В.П.Ларионов аатынан “Инникигэ хардыы” өрөспүүбүлүкэтээҕи эдэр чинчийээччилэр билим кэмпириэнсийэ-күөн күрэстэрин иитинэн “Оскуола билимҥэ кулууптара: кыһалҕата уонна кэскилэ” диэн “төгүрүк остуол” буолан ааста.

Тэрээһиҥҥэ үүнэр көлүөнэни билим-чинчийэр үлэҕэ сыһыарарга көдьүүстээх быһаарыыны көрдүүр соруктаах педагогтар, үөрэх тэрилтэлэрин салайааччылара, учуонайдар, үрдүкү оскуола бэрэстэбиитэллэрэ муһуннулар.  Тэрээһини салайан ыыппыт СӨ үөрэҕин уонна билимин миниистирин бастакы собуйааччы, география билимин дуоктара Михаил Присяжнай тыл этэригэр оскуолаларга билим кулууптарын сайыннарыы Ил Дархан сорудаҕын уонна билим-технологическай сайдыы федеральнай стратегиятын кытта быһаччы ситимнээх стратегическай сорук буоларын бэлиэтээтэ.

«Биһиги сорукпут – хас биирдии оҕо ханна олороруттан тутулуга суох бэйэтин чинчийээччи оруолугар холонон көрөр экосистиэмэни тэрийии. Оскуола билимҥэ кулууба оҕолор улахан билимҥэ киирэллэригэр саҕалыыр кыаҕы бириэхтээх уонна Саха сирин экэниэмикэтигэр инники каадырдары бэлэмниэхтээх” – диэн Михаил Присяжнай эттэ.

“Төгүрүк остуолга” элбэх боппуруоһу таарыйдылар. Н.Э.Бауман аатынан МГТУ билимҥэ, сыыппара сайдыытыгар проректора, бэрэпиэссэр Павел Дроговоз бэйэтин дакылаатыгар үөрэнээччилэри кытта үлэни “Оскуола — үрдүк үөрэх — тэрилтэ” схеманан каадыры бэлэмниир Бүтүн Арассыыйатааҕы систимэни кытта ситимнээн кэпсэтии аанын арыйда.

Ураты болҕомтону быраактыканы көрүүгэ  уурдулар. ХИФУ эбии уонна үрдүк үөрэх иннинээҕи үөрэхтээһиҥҥэ департаменын дириэктэрэ Лариса Сивцева университет оскуолалары кытта үлэтигэр ситиһиилээх моделларын туһунан билиһиннэрдэ.

Педагогтары уонна үөрэнээччилэри өйөөһүҥҥэ чопчу хардыылары Билим Дьоҕус академиятын проректора Александра Яковлева уонна РНА СС криолитозона биологическай кыһалҕаларын институтун учуонайа Аркадий Исаев кэпсээтилэр.

Кэпсэтии иитинэн кыттааччылар оскуола билимҥэ кулууптарыгар халбаҥныыр бырагырааманы уонна мэтэдиичэскэй сүбэ киэбин оҥорор, уһуйааччы-педагогтары көҕүлүүр, өйүүр систиэмэни олохтуур, оскуолалар үрдүк үөрэх тэрилтэлэрин уонна РНА СС Саха сиринээҕи билимҥэ киинин кытта ситимнээх үлэлэрин күүһүрдэр, оҕо бастыҥ чинчийэр бырайыактарын өйүүр соруктаах күөн күрэстэр, граннар систиэмэлэрин киллэрэр ирдэнэрин эттилэр. Бу туһунан Үөрэх уонна билим министиэристибэтин Телеграм-ханаалыгар суруйаллар.