Оҕону көрөн олорор 574 киһи ыйдааҕы босуобуйаны ылар
![](https://sakha-sire.ru/wp-content/uploads/2024/03/kyhyl-ogo-900x596.jpg)
Саха сиригэр оҕону 1,5 сааһыгар диэри көрөн, үлэлээбэккэ олорор 574 киһи ый аайы төлөнөр босуобуйаны ылар диэн Социальнай пуонда Саха сиринээҕи салаата иһитиннэрэр.
2024 сыл олунньу 1 күнүттэн бу босуобуйа базовай кээмэйэ 9227 солкуобайга тэҥнэһэр. Босуобуйа кээмэйэ оройуон коэффициеныттан тутулуктанан, үрдээн иһэр:
- 1,4 оройуон коэффициена — 12 918 солкуобай;
- 1,5 оройуон коэффициена — 13 840 солкуобай;
- 1,6 оройуон коэффициена — 14 763 солкуобай;
- 1,7 оройуон коэффициена — 15 686 солкуобай;
- 2,0 оройуон коэффициена — 18 454 солкуобай.
Бу төлөбүр оҕону көрөн олорооччу үлэтэ суоҕунан босуобуйаны ылбат эрэ буоллаҕына, бэриллэр.
Босуобуйа РФ гражданнарыгар уонна Арассыыйаҕа бастайааннай олорор омук дьонугар, гражданствота суох дьоҥҥо уонна куотан кэлбиттэргэ (беженец) эмиэ бэриллэр.
Онтон Арассыыйа гражданнарын, бастайааннай олорор омук дьонун оҕолоро толору судаарыстыбаннай хааччыйыыга баар, эбэтэр, төрөппүт бырааба быһыллыбыт буоллаҕына, бу босуобуйа анаммат. Маны тэҥэ, атын омук дойдутугар бастайааннай олорорго көһөн барбыт буоллахтарына, эмиэ төлөммөт.
Сайабылыанньаны Социальнай пуонда килийиэннэрин сулууспатыгар, эбэтэр, «Госуслуги» портал уонна Элбэх өҥөнү оҥорор киин нөҥүө биэриэххэ сөп. Уон үлэ күнүн иһинэн быһаарыы ылыллыахтаах.
Сообщить об опечатке
Текст, который будет отправлен нашим редакторам: