«Оҕону оскуолаҕа хомуйуоҕуҥ» аахсыйа бүтүөр диэри үс хонук хаалла

СӨ Үлэҕэ уонна социальнай сайдыыга министиэристибэтэ эрэгийиэн олохтоохторугар сыл аайы ыытыллар «Оҕону оскуолаҕа хомуйуоҕуҥ» аһымал аахсыйа бүтүөр диэри үс эрэ күн хаалбытын санатта.

Атырдьах ыйын 28 күнүгэр диэри хас биирдии киһи тулаайах, төрөппүт көрүүтэ-харайыыта суох хаалбыт оҕолорго уонна олох ыарахан балаһыанньатыгар түбэспит дьиэ кэргэттэргэ саҥа үөрэх дьылыгар бэлэмнэнэллэригэр көмөлөһөр кыахтаах.

Оскуолаҕа аналлаах тэриллэри хомуйуу «Бубль Гум» маҕаһыыннарга ыытыллар. Өрөспүүбүлүкэ олохтоохторо үөрэх кинигэлэрин, тэтэрээттэри, уруучукалары, харандаастары, уруһуйдуур альбомнары, оскуола таҥаһын, атах таҥаһын, үрүксээктэри уонна да атын наадалаах маллары атыылаһан, анал хомуйар пууҥҥа хаалларыахтарын сөп.

Атырдьах ыйын 11 күнүгэр аахсыйаҕа СӨ Үлэҕэ уонна социальнай сайдыыга миниистирэ Елена Волкова бэйэтинэн кыттыыны ылла. «Бу аахсыйа – хас биирдии киһиэхэ үүнэр көлүөнэ кэскилигэр кылаатын киллэрэр кыаҕа. Оҕолорго балаҕан ыйын 1 күнүн көрсө эрэллээх буолууну уонна үөрүүнү бэлэхтиэҕиҥ», – диэн миниистир бэлиэтээтэ.

Үлэ уонна социальнай сайдыы министиэристибэтэ тэрилтэлэргэ, уопсастыбаннай холбоһуктарга уонна бары амарах санаалаах дьоҥҥо туһаайар: аахсыйаҕа кыттыһыҥ — бииргэ буолан биһиги Саха сирин оҕолоро саҥа үөрэх дьылын үөрэ-көтө саҕалыылларыгар көмөлөһөр кыахтаахпыт!

Оскуола тэриллэрин хомуйар пууннар аадырыстара:

• «Бубль Гум» маҕаһыын, «Улуру Молл», 2-с этээс, Кальвица уул., 14/5;
• «Бубль Гум» маҕаһыын, Дзержинскай уул., 71, 2-с этээс.