Оҕоттон смартфонун уорбут киһи тутулунна

Дьокуускай куоракка оптуобуска айаннаан иһэн утуйан хаалбыт оҕоттон төлөпүөнүн уорбут киһини ир суолун ирдээн туппуттарын туһунан ИДьМ Дьокуускайдааҕы салаатын пресс-сулууспата иһитиннэрэр.

ИДьМ Дьокускайдааҕы дьуһуурунай чааһыгар киин куорат олохтооҕо дьахтар 12 саастаах кыыһыттан маршрутнай оптуобуска 15 тыһыынча суумалаах суотабай төлөпүөнүн уорбуттарын туһунан биллэрбит.
Ол түмүгэр суһал-көрдүүр тэрээһин ыытыллан, суһал-көрдүүр отделын үлэһиттэрэ итиитинэ ир суолун ирдээн, тор суолун тордоон, 19 саастаах уорбаланааччыны туппуттар.
Быһаарбыттарынан, эдэр киһи оптуобуска утуйан хаалбыт кыра кыыһы бэлиэтии көрбүт. Бу киһи кыыс оҕо кууркатын дьэҥдьийбит уонна суотабай төлөпүөнү ылан баран, оптуобустан тахсан барбыт. Уоруйах тутуллан, төлөпүөн хаһаайкатыгар төннөрүллүбүт.
РФ Холуобунай кодексатын 158 ыст. 2 чааһынан «Уоруу» диэн Холуобунай дьыала тэриллибит.