Оһоххутун көтүрүмэҥ!

Халлаан тымныйан, куоракка да, тыа сиригэр да хас кыраадыс буолбутун чуолкайдаһыы, оҕолор үөрэнэллэрин-үөрэммэттэрин айдаана. Ол тухары кыраадыс хаһан да чуолкайа суох буолар курдук.

Халлаан тымныйдаҕына, сылыйдаҕына саамай мөҥүллэр-этиллэр дьон, билгэһиттэр быһыылаах. Кулгаахтара төһө эрэ кытаран эрдэҕэ. “Сылаас буолуо диэбиттэрэ, тымныйбыт буолбат дуо?” дэһэллэр оптуобус тохтобулугар соппуосканан тоһугураһан тахсыбыт дьахталлар барахсаттар. Ол билгэһиттэр халлаан туругун курдары көрөр аптаах буолбатахтар ини. Һэ-һэ!

Хата, ол оннугар дьиэлэрин киэҥ-куоҥ, кырасыабай көстүүлээх оҥорор туһугар оһохторун көтүрэллэригэр түргэттэр. Тыа нэһилиэктэригэр гаас киирэн, абыраннылар. Ол эрээри гаас киирдэ, аны тымныы хоппот диэн баран, кирпииччэ оһохторун көтүрэн ыраатыннарбыттара. Дьэ, буолар да эбит! Ол үйэ тухары сылааһынан илгийэн кэлбит оһохпут барахсаны көтүрбэккэ туруорар тоҕо сатаммата буолуой?
Хата, Дьокуускайга “Сатал” сорох ыаллара, били, тоҥо-хата сыспыттарын санаан, сэрэххэ диэн, тимир оһох атыылаһан туруораллар эбит. Саамай сөп. Итини мин, олохпор арааһы көрөн кэлбит кырдьаҕас киһи, биһирии иһиттим.
Саҥа дьыл бырааһынньык күннэрэ, эчи, уһуна-киэҥэ! Сампааныскай «сөлүүттүүр» кэмигэр кыратык сорох дьиэлэргэ уулара-хаардара тоҥо да сыста быһыылаах. Ону түргэнник дьаһанан, туораттылар диэн үөрэбин. Биһигини тымныыбыт куруук тургутар. Ону умнар сатаммат. Бэйэбит эмиэ кыра да буоллар кыахпытынан бэлэмнээх олоруоҕуҥ. Бэл, мин кууһунан атыылыыр баазаттан куруук испиискэ, чүмэчи ылан хаһааныах буолабын даҕаны, түөһэйэн эрэбин дуу, умнан кэбиһэбин ээ. Һэ-һэ! Бэйэбиттэн бэйэм кэлэйэбин.

Биэтэс Билээхэп