Охотскай Перевозка Туруйа күнүн бэлиэтээтилэр

СӨ Бырабыыталыстыбатын Бэрэссэдээтэлин солбуйааччы Ольга Балабкина салайааччылаах бөлөх Томпо улууһун Охотскай Перевоз сэлиэнньэтигэр «Кыталык айана» аан дойдутааҕы орнитологическай обсерваторияны тэрийэр туһунан бырайыагы олоххо киллэрии чэрчитинэн сырытта. Бу туһунан СӨ айылҕа харыстабылын уонна айылҕа пааркаларын, ураты харыстанар сирдэрин биологическай ресурсалар дириэксийэлэрэ иһитиннэрэр.

Санатан эттэххэ, Ил Дархан Айсен Николаев бу бырайыагы Владивостокка буолан ааспыт Илиҥҥи экэнэмиичэскэй пуорумҥа билиһиннэрбитэ.
«Оробуочай бөлөх орнитологическай обсерватория научнай киинин тутарга сөптөөх миэстэлэри көрдө. Итини сэргэ дэлэгээссийэ биир өйдөөн хаалбыт түгэнинэн Охотскай Перевозтааҕы сүрүн уопсай үөрэхтээһин оскуолатын үөрэнээччилэрин уонна тыа сирин волонтердарын кытта көрсүһүүтэ буолла», – диэн СӨ айылҕа харыстабылын уонна айылҕа пааркаларын, ураты харыстанар сирдэрин биологическай ресурсаларын дириэксийэтин дириэктэрин солбуйааччы Саргылаана Михайлова иһитиннэрдэ.

СӨ экологияҕа, айылҕаны туһаныыга уонна ойуур хаһаайыстыбатыгар миниистирэ Евгений Перфильев олохтоохтору кытары көрсүһүүтүгэр волонтердар Зелепухиннар дьиэ кэргэттэригэр Бочуотунай грамоталары туттарда. Розалия уонна Алексей Зелепухиннар 20-тэн тахса сыл устата кинилэр олорор нэһилиэктэрин үрдүнэн көтөн ааһар кыталыктар миграциялыыр, ахсааннарын ааҕарга кытталлар.

Маны сэргэ «Куолума – Чаппанда» ресурснай резервакка кыһыл кинигэҕэ киирбит көтөрдөрү учуоттуур үлэҕэ кытта сылдьар РНА СО ИБПК орнитологтарын Мария Владимирцеваны, Анатолий Лукины, Наталья Сафонованы кытта көрсүһүү буолла. Бу күннэргэ айылҕа харыстабылын ураты харыстанар сирдэринэн көтөрдөр күһүҥҥү миграциялара саҕаланна, Охотскай перевоз олохтоохторо уонна орнитологтар, ордук оҕолор сэдэх көтөрдөрү кытта көрсүһүүнү долгуйа күүппүттэрэ. «Кыталыктар үөрдэрэ халлааҥҥа өрө көтөн тахсан Кытайга кыстыы көттүлэр. Биһиги саас кэлэрин олус кэтэһэбит», – диэн оҕолор санааларын үллэһиннилэр.

Туруйалар үөскүүллэрин харыстыырга болҕомтону тардар сыаллаах, Н.А. Прокопьев аатынан Охотскай Перевоз оскуолатын үөрэнээччилэригэр анаан оонньуу киэбинэн эко-уруок ыытылынна. Бу күн кинилэргэ ураты дьикти, умнуллубат түгэн буолла, тоҕо диэтэххэ, кинилэргэ кыталык бэйэтинэн кэлэн оонньууга эппиэттээтэ, кинилэргэ «Кыталык айана» оонньууну оонньоотто.
Охотскай Перевоз оскуолатын үөрэнээччитэ 8-с саастаах Маргарита Сергеева кыталык оҕото буолан көттө-дайда. Оттон тэрээһин бүтүүтэ оҕолор дьолу аҕалар ымыыны – кумааҕы туруйаны оҥорорго үөрэннилэр.
#сохраним_стерха