Оһуохай сайдар, солбук үүнэр

Оһуохай уопсастыбатын 35 сыллаах үбүлүөйүгэр ананан тахсыбыт итинник ааттаах кинигэбин Сунтаар улууһун В.Г.Игнатьев аатынан Дьаархан орто оскуолатын үөрэнээччилэригэр билиһиннэрдилэр.

Бу кинигэ ис хоһоонунан өрөспүүбүлүкэтээҕи Оһуохай уопсастыбатын үлэтин туһунан Саха сирин Дархан этээччитэ Л.Н.Иванова уонна Саха сирин үтүөлээх этээччитэ Дмитрий Кондратьев кэпсээтилэр. СӨ Ил Дархана А.С.Николаев ыйааҕынан 2022 сылга бастыҥ этээччилэргэ биир сыллаах истипиэндьийэ анаммыта. Бу кинигэҕэ стипендиаттар уонна Үс Хатыҥ ыһыаҕын кэнники биэс сыллааҕы кыайыылаахтарын туһунан кэпсэниллэр.

Көрсүһүүнү тэрийэн ыыппыт Дархан этээччи Лариса Николаевна бэйэтэ этэрин таһынан ыччаттары, оҕолору оһуохайга үөрэтэр. Элбэх үөрэнээччилэриттэн биирдэстэрэ Дмитрий Кондратьев быйыл Саха сирин үтүөлээх этээччитин аатын ылбыта. Лариса Николаевна 60 сааһынан Дьокуускайга икки күннээх Оһуохай күрэһин Сунтаардааҕы култуура уонна духуобунас управлениетын кытары үрдүк таһымнаахтык тэрийэн ыыппыттара.

Бу күннэргэ оскуола уонна Добун культурнай киин фольклору, ырыаны, үҥкүүнү сэргиир оҕолорго лааҕыр аһаары сылдьаллар. Салгыы итинник көрсүһүү бүгүн Тойбохой орто оскуолатыгар ыытыллыаҕа.

Марта Николаева