Хаартыска: СИА архыыбыттан.
Аҕыйах сыллааҕыта 15 тыһ. тахса киһи кыттыылаах оһуокайга Гиннес рекорда олохтоммута, бүтүн дойду дьоно-сэргэтэ биһирээбитэ. Онтон ыла өрөспүүбүлүкэтээҕи Оһуокай күнүн олохтуоҕуҥ диэн этии уостан түспэккэ этиллэн кэллэ. Бүгүн СӨ Бырабыыталыстыбатын бэрэссэдээтэлин солбуйааччы Сергей Местников өрөспүүбүлүкэтээҕи Оһуокай күнүн олохтуур туһунан Ил Дархан ыйааҕа бэлэмнэммитин иһитиннэрдэ.
Бу бэлиэ, үөрүүлээх түгэн тосхойон эрэриттэн үөрэн, өрөспүүбүлүкэ оһуокайдьыттара балаҕан ыйын 7 күнүгэр бүтүн Саха сирин үрдүнэн сомоҕолоһуу, түмсүү оһуокайын тэрийиэҕиҥ диэн этии көтөхпүттэр. Бүгүн оробуочай бөлөх тэрээһин түмүк боппуруостарын быһаарыста.
СӨ Бырабыыталыстыбатын бэрэссэдээтэлин солбуйааччы Сергей Местников: “Оһуокай” түмсүү — Саха сиригэр баар, норуоппут төрүт култууратын өйүүр түмсүүлэртэн биир кырдьаҕастара. Онон кинилэр этиилэрин ылынан түмсүү, сомоҕолоһуу, биир буолуу түһүлгэтин — оһуокайы тэрийэргэ сөбүлэспиппит. Оһуокайга төгүрүччү туруу хаһан баҕарар биир санаанан, биир толкуйунан өрөспүүбүлүкэбит кэскилин түстүүр”, — диэн оһуокай үрдүк суолталааҕын бэлиэтээн эттэ.
Мунньахха иһитиннэрбиттэринэн, оһуокайы Саха сиригэр киэҥник биллэр биэс киһи таһаарыаҕа. Манна мустубут дьон тоҥолох-тоҥолохторуттан ылсан, күн эргииринэн сомоҕолоһуу оһуокайыгар кыттыаҕа.
“Оһуокай” түмсүү бэрэссэдээтэлэ Александр Данилов: “Сахалар саамай кэтэһиилээх күммүт үүнэн, оһуокайбыт күнэ тыган эрэр, Ыйаах Ил Дархан илии баттааһыныгар киирбит. Мантан ыла ыам ыйын 25 күнүгэр, Саха сирин бары үөрэнээччилэрэ оскуоланы бүтэрэр үөрүүлээх кэмнэрин кытта бииргэ Оһуокай күнүн бэлиэтиэхпит.
Оһуокайдаах улууска — сайдыы тахсар, оһуокайдаах улууска – саха оҕото төрүүр. Үстэн элбэх оҕолоох улуустар бары оһуокайдарын өрө тутан илдьэ сылдьар улуустар. Оһуокай саамай күүстээх үлэтэ демография боппуруоһугар көстөр. Улуус баһылыктара маны ырытан көрөллөрө суолталаах”, — диэн этэр.
Оһуокай, сомоҕолоһуу түһүлгэтэ балаҕан ыйын 7 күнүгэр киэһэ 18 ч. Саха сирин сүрүн болуоссаттарыгар барытыгар тэҥинэн, Дьокуускай куоракка Орджоникидзе болуоссакка ыытыллыаҕа. Баҕалаах дьон-сэргэ, ыччат, оҕо аймах кэлэн төрүт үҥкүүбүтүгэр – оһуокайга кыттаргытыгар ыҥыраллар.
Хаҥалас улууһун 1-кы Малдьаҕар нэһилиэгин олохтоохторо ааспыт өрөбүллэргэ бэлиэтэммит "Нэһилиэк күнүгэр" бэртээхэй сонуну истэн үөрдүлэр.…
Бу күннэргэ Амма улууһун баһылыга Степан Кузьмин кыстыкка киириигэ бэлэмнэнии чэрчитинэн улуус киинин хочуолунайдарын туруктарын…
Таатта Харбалааҕар Аҕа дойду Улуу сэриитигэр кыайыы 80 сыллаах үбүлүөйүн көрсө бэлэмнэнии үлэ саҕаланна. "Дьоһуннааҕы…
Бүгүн СӨ Урбааҥҥа, атыыга-эргиэҥҥэ уонна туризмҥа миниистирэ Тимур Ханды министиэристибэ үлэһиттэригэр «Туризмы сайыннарыы уонна территориальнай…
Балаҕан ыйын 14 күнүгэр "Мукучу нэһилиэгэ" МТ баһылыга Николай Иванович Левин, "Сарыал" түөлбэ салайааччыта Анна…
Нам улууһун баһылыга Юрий Слепцов анал дьаһалынан улуус социальнай-экэнэмиичэскэй сайдыытын пуондатын бырабылыанньата халаан уутуттан эмсэҕэлээбит…