«Оһуокай» түмсүү Намҥа ыалдьыттаата

Өрөспүүбүлүкэтээҕи «Оһуокай» түмсүү  аатыттан бэҕэһээ СӨ Дархаттарын түмсүүтүн бэрэссэдээтэлэ В.В.Хорунов салайааччылаах дэлэгээссийэ  Намҥа Оһуокай күнүгэр тахсан кытынныбыт.

Бырааһынньык күнүгэр да сырыттарбыт инники үлэбит торумун билсиһиннэрдибит, Нам оһуокайын түмсүүтэ урукку үтүө үгэһи салгыы тутарыгар баҕардыбыт. Нам түмсүүтүн «Оһуокай» бэрэссэдээтэлэ Татьяна Ивановна Евсеева өр сылларга үрдүк таһымнаахтык үлэлээтэ. Элбэх ыччаты иитэн-үөрэтэн таһаардылар. Онон солбугу эрэллээх эдэр көлүөнэҕэ дьоһуннаахтык алҕаан туттардылар. Татьяна Ивановна дуоһунаһын Вера Цыпандинаҕа эрэнэн туран туттарда.

Хас да эдэр этээччи түһүлгэ таһааран, үөрүүбүт үрдээтэ, ыччаттарбыт түһүлгэлэригэр үөрэ-көтө үҥкүүлээтибит. Валентин Васильевичка Нам оһуокайын түмсүүтүгэр сыралаһан үлэлэспитигэр махтаннылар.

Валентин Васильевич солбуйааччылара, Оһуокайга сирдьиппит А.Е.Алексеев уонна М.Т.Николаева салгыы Оһуокай сайдыытыгар биир санаанан, өйөһөн үлэлииргэ баҕа санаабытын эттибит. «Оһуокай» өрөспүүбүлүкэтээҕи  түмсүүтүн бэрэссэдээтэлэ А.Д.Данилов-Дьулуур Хаан аатыттан махтал суруктары Т.И.Евсееваҕа, М.М.Бястиноваҕа, В.П.Колпашниковаҕа туттардыбыт.

Марта Николаева