“Оһуокай” уопсастыба  ыһыаҕа үрдүк таһымҥа ыытылынна

Оһуокайбытын  «Күн үҥкүүтэ» диэн мээнэҕэ эппэттэр. Ол курдук,  анаабыт курдук сырал, чаҕыл күн оһуокайдааҥ диэбиттии,  көмүс сардаҥаларынан хас биирдиибитин угуттаата,күүс уох биэрдэ.

«Оһуокай! уопсастыба ыһыаҕын  арыллыытын алгыһын Нам, Эҥсиэли хочотун оһуокайдыттара, Саха Өрөспүүбүлүкэтин үтүөлээх оһуокайдыта С. Алексеев алгыстаан арыйда. Добун арыллыы оһуокайын Сахабыт сирин Дархан оһуокайдьыта,  Намтан сылдьар, Нам ыччатын оһуокайга уһуйааччы Валентин Хорунов саҕалаата.  Дьэ,  онтон бииртэн биир үчүгэй куоластаах, тэтимнээх оһуокайдьыттар хоннохторо арыллан, хоһоонноро холбоһон ыһыаҕы, эйэни, үлэни, үөрэҕи уруйдаан-айхаллаан хоһуйуу мааныта буолла.  Ыһыахпыт түһүлгэтигэр күндү маанылаах ыалдьыттар кэлэннэр,  ыһыах таһымын үрдэттилэр.  Ол курдук,  СӨ Судаарыстыбаннай мунньаҕын (Ил Түмэн)  бэрэссэдээтэлин  солбуйааччы Антонина Григорьева, Дьокуускай куорат паркатын хаһаайына Виктор Обутов, «Биир ньыгыл Арассыыйа” бэрэссэдээтэлэ Руслан Платонов, Ньурба улууһун култууратын департаменын салайааччы, дьахталларга аан маннайгы Аар Дархан оһуокайдьыта Розалия Тихонова, оһуокай өрөспүүбүлүкэтээҕи уопсастыбатын бэрэссэдээтэлэ Александр Данилов ыһыахпыт күндү, маанылаах ыалдьыттара буоллулар.  Кинилэр бары илии тутуурдаах,эҕэрдэлээх кэлэннэр, дьон сүргэтин,  үөрүүтүн көтөхтүлэр. Ол курдук,  култуура эйгэтигэр 45 сыл эҥкилэ суох үлэлии айа-тута сылдьар, норуот ырыатын-тойугун, оһуокайын дьонҥо-сэргэҕэ тириэрдэр, Арчы дьиэтин иһинэн   “Күн дьоно” фольклор бөлөҕүн 11-с сылын  тэрийэн үлэлэтэр импровизитор-тойуксут, оһуокайдьыт,  Күөх Ньурбаттан төрүттээх Евдокия Павловаҕа “Саха Өрөспүүблүкэтин култууратын туйгуна” бэлиэни Антонина Григорьева киэҥ түһүлгэҕэ туттарбыта үрдүк үөрүүнү аҕалла.

“Оһуокай” уопсастыба бэрэссэдээтэлэ, ыһыаҕы тэрийээччи Александр Джурович Ил Түмэн уонна Дьокуускай куорат мээрэ Евгений Григорьев Бочуотунай грамоталарын, Махтал суруктарын  оһуокайдьыттарга, оһуокай улуустааҕы салааларын   бастыҥ салайааччыларыгар   Станислав Ивановка (Мэҥэ Хаҥалас),  Валентин Хоруновка (Нам)  туттартаата. Оһуокай уутуйан үөскээбит сириттэн Күөх Ньурбаттан оһуордаах оһуокай  оһуокайдьыттара: СӨ култууратын туйгуна Розалия Тихонова, Ньурба улууһун Дархан оһуокайдьыта Прокопий Давыдов  киэҥ түһүлгэҕэ  этэн доллоһутаннар,  ыһыах дьонун  үөрүүтүн өссө үрдэттилэр,үөртүлэр.

Итини сэргэ өрөспүүблүкэбит ааттаах-суоллаах оһуокайдьыттара бары кэриэтэ тэптэн туран оһуокайдаан ойуттулар, эһиэкэйдээн дьиэрэттилэр. Ол курдук,  Саха сирин үтүөлээх оһуокайдьыттара Руф Елисеевич, Мария Бассанова, Каджана Евсеева, Марта Николаева, Людмила Кривошапкина, Иван Бурцев уонна да атыттар хомоҕой хоһооннорунан хоһуйан,  оһуокай ыһыаҕын уруйдаатылар- айхаллаатылар.

Хайа  да ыһыах аһынан-үөлүнэн аатырар. Ол да иһин  минньигэс ис миинэ, арыылаах алаадьы, кымыс сандалыта тардылынна,  дьон-сэргэ,  ыһыах ыалдьыттара бары астыннылар.

Быйылгы сыллаах оһуокай ыһыаҕа үрдүк таһымҥа ыытыллыбытыгар салайааччыларбытыгар Александр Джуровичка,  Александр Тарскайга уонна ыһыах көрүн-нарын ыытаачччлар Ирина Абрамоваҕа,  Марта Николаеваҕа махтал буолуохтун!

Сахабыт сирин үс өргөстөөх оһуокайа,  үҥкүүтэ, хоһооно, хоһуйуута көлүөнэттэн көлүөнэҕэ үксүү, үрүлүйэ туруохтун!

Евдокия ПАВЛОВА-КЫЛЫҺАХ ДАЛБАР, “Күн дьоно” этно-фольклор бөлөҕүн салайааччы, норуот ырыаларын, тойуктарын, оһуокайын тарҕатааччы, үөрэтээччи, СӨ култууратын туйгуна.