Хаартысканы Марта Николаева тиксэрдэ
Итинник ааттаах СӨ бырабыыталыстыбатын быһаччы өйөбүлүнэн, иккис төгүлүн 7-тэн 17 сааһыгар диэри саастаах оскуола оҕолоругар өрөспүүбүлүкэтээҕи Оһуокай күрэҕэ ыытылынна.
Күрэҕи өрөспүүбүлүкэтээҕи норуот айымньытын киинэ сүрүннээн ыытта. Түөрт Бүлүү, илин эҥээр улуустар бары, Кэбээйи, Горнай, Алдан улуустарыттан кытыннылар. Ленскэй улууһуттан оҕолор өрөспүүбүлүкэтээҕи финалга видеонан устан ыыппыттар. Икки бөлөҕүнэн оҕолор элбэхтэрин иһин бөлөҕүнэн арахсан күрэхтэстилэр. Оҕолор сүрүннээн Кыайыы 80 сылын хоһуйан эттилэр.
Урукку өттүгэр Дьокуускай куораттан син кыттар эрээри, сүрүн миэстэлэргэ анньыспат эбит буоллахтарына, бу сырыыга оҕолор бары биир тэҥник сайдыбыттарын, тыаҕа да, куоракка да араастаһыыта суох оһуокай биир тэҥҥэ сайдан эрэрин бэлиэтии көрдүм. Урукку өттүгэр наар Бүлүү бөлөх оҕолоро ордук баһыйар эбит буоллахтарына, бу күрэххэ Таатта да, Хаҥалас да Үөһээ Бүлүү да буоллун биир тэҥ күүстээхтик, тэҥ баайыылаахтык, сиппит этээччилэр курдук этэллэрин бэлиэтиибин. Манна бастатан туран, Оһуокай түмсүү этээччилэрэ бэйэлэрэ этэллэрин таһынан, оҕону, ыччаты кытта үлэлэһэ сылдьалларыттан оҕолорго үлэ баран иһэрэ көһүннэ. Ол курдук, Дархан этээччи Афанасий Попов, үтүөлээх этээччилэр Лариса Попова, Мария Афанасьева, Мария Иванова, Розанна Герасимова, Марианна Хобусарова о.д.а. Оһуокай өрөспүүбүлүкэтээҕи түмсүүтүн этээччилэрэ кэскиллээх үлэни ыыта сылдьалларын туоһута буолар.
Сүрүн кыайыылаахтарынан 7-12 саастаахтарга Бастакы үктэл аатын Лев Тарасов (Таатта) ылла. Иккис — Вальдимар Иванов (Сунтаар), үһүс Харысхан Руфов (Үөһээ Бүлүү) буоллулар. Бу бөлөххө бастакы үрдэл аата Степан Гаврильев (Ньурба) 35 000 суумалаах сертификатынан, иккис үрдэл Ольга Мухоплева (Дьокуускай) 25000, Витя Васильев (Дьокуускай) 15000 солк. суумалаах сертификаты СӨ культуратын, духуобунас сайдыытын миниистирэ А.И.Ноев аатыттан туттулар.
13-17 саастаахтарга бастакы үктэл аатын Чурапчыттан Настасия Рожина, иккис үктэл Дьокуускайтан Марк Слепцов, үһүс үктэл Василиса Фокинова (Сунтаар) буоллулар. Бастакы үрдэл Камелия Яковлева, Ньурба (45000 суумалаах сертифткат), иккис үрдэл Камила Степанова, Үөһээ Бүлүү (35000 солк. сертификат), үһүс үрдэл Айыллаана Попова, Таатта (25000 солк. сертификат) буоллулар.
Ахсынньы аам даам тымныытыгар көхтөөхтүк кыттыбыт оҕолорго, салайааччыларыгар махтанабыт.
СӨ бырабыыталыстыбатын бэрэссэдээтэлин солбуйааччы С.В.Местников кэлэн кытынна, оҕолору эҕэрдэлээтэ,оһуокай дьарыгын салгыы сылдьалларыгар баҕарда.
Марта Николаева
Нерюнгри куоракка оҕолор "маассабай" сүһүрүүлэрэ таҕыста диэн иһитиннэрии бүгүн сарсыарда социальнай ситимнэринэн, мессенджердэринэн тарҕанна. СӨ…
Госавтоиниспиэксийэ иһитиннэрэринэн, ахсынньы 11 күнүгэр 18:30 ч. Өлүөхүмэ куоракка 2 нүөмэрдээх оскуола чугаһыгар сатыы дьон…
Бүгүн, ахсынньы 13 күнүгэр, өрөспүүбүлүкэ соҕуруу, соҕуруулуу-арҕаа, хотугулуу-илин өттүгэр кыралаан хаардыаҕа. Киин, арҕаа оройуоннарга туманнаах,…
Бүгүн Субуота – Сатурн планета салайар күнэ. Ыксалга эбэтэр чаҕылхай көрсүһүүлэргэ анамматах күн. Сатурн биһигиттэн…
Бүгүн, ахсынньы 12 күнүгэр, 202-с түөлбэҕэ саҥа элбэх функциялаах ыччат "Патриот" киинигэр өрөспүүбүлүкэ ыччатын түмүктүүр…
Саха сирин үөрэҕин систиэмэтигэр суолталаах тэрээһинэн буолбут “Сыл учуутала” өрөспүүбүлүкэтээҕи 34-с төгүлүн ыытыллар күөн күрэс…