Оһуокайдьыттарбыт Олоҥхо сүрүн кыттыылаахтара

Сэтинньи 27 күнүгэр Арчы дьиэтигэр Бүлүү улууһун «Олоҥхо» народнай ансаамбылын толорооччулара В.О.Каратаев  «Модун Эр Соҕотох» олоҥхотуттан быһа тардан испэктээк көрдөрдүлэр.

Манна биһиги республикатааҕы Оһуокай түмсүүбүт үтүөлээх этээччилэрэ кытталларын иһин, интэриэһиргээн баран көрдүм. Испэктээк иннинэ алгысчыт Агафья Мылахова Аар Айыыларга үҥэн-сүктэн көрдөһөн, аал уотун оттон алҕаата. Хас биирдии төгүрүччү турбут дьоҥҥо алгыс үтүө тылларын этэн санааларын бөҕөргөттө. Орто туруу бараан дойдубутугар үтүө олох туругурдун диэн көрдөстө, байыаннай  дьайыыга сылдьар байыастарбыт Кыайыы кынаттанан кэлэллэригэр үтүө тылынан көрдөстө.

Алгыс кэнниттэн Бүлүүтээҕи «Олоҥх»о народнай ансаамбылын толорооччуларын иһиттибит. 2026 сылга олоҥхоһут Василий Каратаев 100 сылын көрсө тэрээһин үлэтэ саҕаламмыт. Сүрүн оруолу Саха сирин үтүөлээх этээччитэ Николай Афанасьев-Айдаман кыайа-хото тутан толордо. Тойуга да доллоһутан истэргэ үчүгэй, саҥарар саҥата чуолкай. Эмиэ бу испэктээккэ үтүөлээх этээччилэрбит Геннадий Харлампьев, Петр Григорьев толоруулара эмиэ истээччини итэҕэтэр, тардар күүстээхтик олоҥхолоотулар. Олоҥхоҕо эдэр толорооччулар баалларын биһирээтим. Нарыйа Шамаева, Роберт Томскай, Рудольф Иванов оруолларын арыйдылар. Биһиги өрөбүллээҕи Оһуокайбытыгар мэлдьи көхтөөхтүк кыттар Людмила Леонтьева Сабыйа баай Хотун оруолун арыйда, куолаһа да чөллөркөй.

Онон биир санаанан түмүктээн эттэххэ, биһиги үтүөлээх этээччилэрбит алмаас таас кырыыламмытыныы дьоҕурдара, талааннара сөхтөрөр. Олоҥхо кэнниттэн тимир ууһа Николай Степанов оҥорбут Кыайыы кылыһын Оһуокай түһүлгэтигэр эдэр уолаттар батыйаны тутан туран көрдөрдүлэр. Оһуокай түһүлгэтин үтүөлээх этээччилэр Николай Афанасьев- Айдаман,Геннадий Харлампьев о.д.а. эттилэр.

Марта Николаева