Оһуокайга уус алданнар түмүстүлэр

Кулун тутар 23 күнүгэр Оһуокай республикатааҕы түмсүүтүн өйөбүлүнэн Кыайыы 80 сылын көрсө, Уус Алдан улууһа Кыайыыга аналлаах Оһуокайы тэрийэн ыытта.

Куоракка олорор Уус Алдантан төрүттээхтэр мустан, биир дойдулаахтарыныын ирэ-хоро кэпсэттилэр, оһуокайдаатылар. Кыайыы Оһуокайын түһүлгэтин Аар Дархан этээччи С.И. Черноградскай таһаарда. Ол кэнниттэн биир дойдулаахтарын хоһоонньут Сайдар Айар Кыыдаана бэйэтэ айбыт ырыатынан эҕэрдэлээтэ. Оһуокай түһүлгэтин Уус Алдантан төрүттээх Ирина Басынысова, Владимир Бурцев о.д.а. таһаардылар.

Кыайыы Оһуокайыгар дьүөгэтин өйөөн кэлбит, судаарыстыбаннай сулууспа бэтэрээнэ В.В.Романова бүгүҥҥү тэрээһин туһунан санаатын маннык үллэһиннэ:

— Мин аан бастаан Арчы Ытык Оһуокайыгар дьүөгэбин,СӨ үтүөлээх учуутала, учууталлар учууталлара, Уус Алдан улууһун бочуоттаах гражданина С.Е.Нафаилованы өйөөн кэлбитим. Дьүөгэм үрдүк үөрэҕи бүтэриэҕиттэн, Кэптэнигэ кийиит, олоҕун үөрэҕирии салаатыгар анаата. Омук тылын учууталынан үрдүк таһаарыылаахтык үлэлээн, уус алданнар биир убаастабылынан туттар педагогтара буолар. Кини биир дойдулаахтарын өйөөн кэлэн баран, олус сэргээтим. Наһаа сэргэхтик ыытар эбиккит. Быыһыгар наһаа талааннаах дьон баҕатынан ыллыырын ситиспиккит. Оһуокай быыһыгар сахалыы тэтимнээх ырыаларынан үҥкүү буолар эбит. Мин Сэмэн Черноградскай, Светлана Сивцева түһүлгэлэригэр дуоһуйа оһуокайдаатым. Оһуокай тылынан Кыайыыга аналлаах түһүлгэни тэрийэргитин сэргээтим, олус астынным.
Дьэ ити курдук, Бороҕонтон оһуокайдьыттар киирэн, куоракка бииргэ олорор биир дойдулаахтарынан алтыһан,олус астыннылар.

Марта Николаева