Оһуордаах Оһуокай — олоҕум аргыһа

Итинник ааттаах күрэх алтынньы 3 күнүгэр Ытык Күөлгэ үрдүк таһымнаахтык ааста. Күрэх Саха сирин үтүөлээх этээччитэ, Дьохсоҕон нэһилиэгин бочуоттаах олохтооҕо Потапов Иван Иванович төрөөбүт күнүгэр — 75 сааһыгар ананан ыытылынна. 

Күрэххэ Таатта, Мэҥэ Хаҥалас, Чурапчы улуустарыттан элбэх кыттааччылаах делегация кэлбитин  таһынан Горнайтан, Дьокуускайтан, Намтан, Уус Алдантан этээччилэр мустан, сайыҥҥы Үс Хатыҥ улахан түһүлгэтин санаттылар. 11 үтүөлээх этээччи уонна 22 саҥа этээччи икки сиринэн культура, спорт сайдыытын киинигэр уонна Алгыс балаҕаныгар икки сиринэн барда.

Эбиэт кэнниттэн үтүөлээх этээччилэр күрэхтэрин кэнниттэн, саҥа этээччилэр салгыы этэн, күрэх салҕанна. Икки бөлөхтөн түөртүү этээччи талыллан, финалга киирэн, тиэмэ талан, бэлэмнэммэккэ, тутатына хоһуйдулар. Бастакы түһүмэххэ үбүлээр Иван Иванович айар үлэтигэр, кэргэнэ Галина Семеновналыын 50 сыл бииргэ олорбуттарын хоһуйбут буоллахтарына, финалга талыллан киирбит этээччилэр тэрийээччилэр бэлэмнээбит тиэмэлэринэн тутатына хоһуйбуттара сөхтөрдө, үгүстэр биэс мүнүүтэ иһигэр түһүлгэлэрин тутан, хоһуйан, маастарыстыбалара үрдүгүн көрдөрдүлэр.

Үтүөлээх этээччилэри Дархан этээччилэр Валентин Хорунов, Афанасий Попов уонна саха тылын учуутала Оксана Андросова, саҥа этээччилэри Дархан этээччилэр Марта Николаева, Денис Оконешников, үтүөлээх этээччи, үбүлээрбит Иван Иванович Потапов сыаналаатылар. Күрэх усулуобуйатын биир ирдэбилэ балаһыанньа быһыытынан күрэх туһаайыытын тутуһаллара ирдэннэ. Саҥа этэн эрэр этээччилэр ити ирдэбили сөпкө тутуһан, тутатына хоһуйарга маастарыстыбалара биллэ тупсан эрэрин бэлиэтии көрдүм. Иккис үтүө хаачыстыбанан Дархан, үтүөлээх этээччилэр  үөрэнээччилэрэ үчүгэй утуму тутан, аны салгыы эмиэ бэйэлэрэ үөрэнээччилэри кытары үлэлэһэ сылдьаллара үөртэ. Холобур, Иван Иванович, Афанасий Николаевич үөрэнээччилэрэ Ытык Күөлгэ Лариса Попова, Уус Тааттаҕа Айта Васильева оһуокайга үөрэнээччилэри кытары ылсыһан үлэлии сылдьаллара үөрдэр. Кинилэр үөрэнээччилэрэ билигин ханнык баҕарар күрэххэ үчүгэйдик кыттар буоллулар. Бу этээччилэрэ бэйэлэрэ идэтийэн этэллэрин таһынан, үөрэппит учууталларын такайыытын ылынан, элбэх үөрэнээччини кытары үлэлэһэ сылдьаллара үөрдэр.
Күрэх кыайыылаахтарынан икки бөлөҕүнэн Кылаан чыпчаал аатын үтүөлээх этээччилэргэ Илья Наумов, саҥа этээччилэргэ Чурапчы Болтоҥо нэһилиэгиттэн Дьячковская Валентина Ивановна буоллулар. Күрэх биир уратытынан саҥа этээччилэргэ кылаан ааты ылбыт Валентина Дьячковская үтүөлээх этээччи аата иҥэриллэн, бары да үөрдүбүт. Бөлөхтөрүнэн бастакы үрдэли үтүөлээх этээччилэргэ Дьокуускайтан Мария Иванова, саҥа этээччилэргэ Дьохсоҕонтон төрүттээх Маайа Беленкова ыллылар. Манна эбэн этэн эттэххэ, үтүөлээх этээччи Мария Иванова оскуола оҕолоругар фольклору сэргэ оһуокайынан дьарыктаан эрэрэ үөрдэр.
Иккис үрдэли үтүөлээх этээччилэргэ Лариса Попова, саҥа этээччилэргэ Мэҥэ Хаҥаластан Роман Иванов, үһүс үрдэли үтүөлээх этээччилэргэ Айаал Аммосов, саҥа этээччилэргэ АГИКИ устудьуона Марфа Степанова ааттаннылар.
Таатталар күрэҕи үрдүк таһымнаахтык ыыппыттара элбэх, сыаналаах бириистэри туруорбуттарыттан көстөр. Улуус бары тэрилтэлэрэ, нэһилиэктэр, үбүлээр Иван Иванович дьиэ кэргэнэ,оҕолоро, республикатааҕы Оһуокай уопсастыбата этээччилэргэ спонсордаан үтүө өйдөбүлү хааллардылар. Таатта улууһун норуот айымньытын киинэ, культура управлениета күрэҕи кыайа-хото туттулар. Бу тэрээһиҥҥэ эппиэттээх исписэлиис Майя Гаврильевна Егорова күрэҕи тэрээһиннээхтик ыытта. Хас биирдии кыттааччыга Таатта улууһун бастыҥ асчыта Мария Егоровна Бондарева арыынан алла сылдьар, ип итии саламаатынан күндүлэнэн, буор куттара бөҕөргөөтө.
Үбүлээргэ  тохтоон эттэххэ, Иван Ивановиһы улууһун дьоно-сэргэтэ, тэрилтэлэрэ үрдүктүк сыаналыылларын бэлиэтии көрдүм. Мааны ыал аҕа баһылыгар дириҥ ытыктабыл баарын сөхтүм. Учуутал эрэ быһыытынан муҥурдаммакка, спортсмен, олоҥхоһут, оһуокайдьыт, үҥкүүһүт, хор ырыаһытын быһыытынан үрдүктүк сыаналанар. Үҥкүү тылын этэрин таһынан, элбэх үөрэнээччитэ сир симэҕин курдук чэчирээн, бэйэтин кытта тэҥҥэ оһуокайдыы сылдьаллара сөхтөрөр. Утуму тутууга үлэлэһэрин хайгыы көрдүбүт.

Республикатааҕы Оһуокай уопсастыбатын салайааччыта, киэн туттар баһылыкпыт Александр Джурович Данилов-Дьулуур Хаан, солбуйааччыта Александр Лаврентьевич Тарскай ытык Таатта сиригэр оһуокай күрэҕин үрдүк таһымнаахтык ыытыспыттарыгар, өйөөбүттэригэр дьон-сэргэ махталын эттэ. Манна кыттыбыт хас биирдии этээччи илии тутуурдаах, өттүк харалаах, Ытык Таатта алгыстаах салгынынан арчыланан бардылар. Күнүһүн күн сандаара тыкта, түүнүн ыйынан арчыланан дьиэбитин буллубут.

Марта Николаева