Ойуун Борокуопай төрөөбүтэ 105 сылынан икки кинигэ күн сирин көрдө

От ыйын 4  күнүгэр Дьокуускайга хомус түмэлигэр Ойуун Борокуопай туһунан «Абый талба талаана» икки чаастаах кинигэ сүрэхтэннэ. Кинигэни Прокопий Егорович Слепцов орто кыыһа Екатерина Прокопьевна Черемкина хомуйан оҕордо.

Ойуун Борокуопай айылҕаттан айдарыылаах норуот талааннааҕа — хоһоонньут, ырыа айааччы, тойуксут, хомусчут, алгысчыт, артыыс, үҥкүүһүт, муусукаһыт, саха мусукаалынай үнүстүрүмүөннэрин оҥорооччу быһыытынан билиниллэр. Дойдутугар Абый Кэбэргэнэтин кулуубугар Прокопий Слепцов аата иҥэриллибитэ.

Кинигэ икки чааһа Абый улууһун баһылыга Владимир Вадимович Новиков өйөбүлүнэн 300 ахсаанынан «Офсекка» бэчээттэнэн таҕыста. Бу кинигэ саха төрүт култууратын, сиэрин-туомун, ырыатын-тойугун, мусуукатын үөрэтиигэ улахан туһалаах буолуоҕа.

Августина ВЛАДИМИРОВА-ХАБАРОВА