Ойуунускай айымньытын видео дьүһүйүү оҥорон, түмэлгэ бэлэхтээтилэр

Сэтинньи 11 күнүгэр, айар тыл аҕата Былатыан Ойуунускай төрөөбүт күнүгэр, Литературнай түмэлгэ бэлиэ тэрээһин буолла.

Афанасий Ноев, култуура миниистирэ:
— Былатыан Ойуунускай аатынан Литературнай түмэлгэ маннык тэрээһин ыытыллара улахан суолталаах. Хайаан да үбүлүөйүгэр эрэ буолбакка, сыллата кинини өйдөөн-санаан ааһарбыт кэрэхсэбиллээх. Маннык саҕалааһыннартан төрүттэнэн, үтүө аата үйэлэргэ өссө да ааттана туруо, — диэн эттэ.
»Мөлүйүөн аҥаара ахсааннаах норуокка гений диэн баар буоллаҕына, Ойуунускай баар. Кини аата үйэлэр аастахтарын ахсын, өссө чаҕылыйан, сырдаан иһиэҕэ», — диэн »Чолбон» сурунаал бас эрэдээктэрэ Гаврил Андросов бэлиэтээтэ.
Ойуунускай 1917-23 сс. Саха сирин устуоруйатыгар туох буолбутун сылааһына суруйан, араас жанрдаах бэрт дьикти айымньыны айбыта. Ол айымньыны видео дьүһүйүү оҥорон, киинэ устубуттара.
Георгий Никонов, Ил Дархан сүбэһитэ:
— Ыччат көрөрүгэр, ылынарыгар анаан, видео кэпсээн быһыытынан оҥордубут. Бастаан саҕалыырбытыгар артыыстары ыҥыран, үлэлэппиппит. Сүрдээх үлэлээх этэ. Саха тэлэбиидэнньэтигэр, араадьыйаҕа тахсан турар. Дьон да бэркэ сэҥээрбитэ. Жанрдара элбэх буолан, бэрт дьикти айымньы, онон ааһан иһэн буолбакка, анаан оҥостон олорон, көрүөххэ наада. Бу видеонан дьүһүйүүнү Литература түмэлигэр үйэлээх харайыыга бэлэхтиибит, — диэн эттэ.
»Бу үлэ суолтата олус улахан. Хараллыыга хаалбыта үчүгэй. Биһиги кэннибититтэн да, баҕар, кэнэҕэски ыччаппыт Ойуунускайы бу киинэнэн арыйыа», — диэн түмэл дириэктэрэ Рустам Каженкин бэлиэтээтэ.
Бу киинэни оҥорууга »Тааттаавтодор» тэрилтэ улахан өҥөлөөх. Киинэни устубут дьоҥҥо Махтал суруктары туттардылар.