Ойуунускай экономикаҕа көрүүлэрэ, Үлэ Дьоруойа Африканович, архитектор Иван Шишигин…

Сахалыы тыллаах саамай кырдьаҕас «Чолбон» сурунаал Үлэ сылын түмүктүүр ахсынньытааҕы нүөмэригэр ааҕыҥ:

Былатыан Ойуунускай Саха АССР экономикатын сайдыытын хайдах анаарарый? Дакылааты сэргэ учуонай уонна суруйааччы Эдуард Ефремов-Дэхси санаатын үллэстиитин;

Литература кириитигэ Баһылай Бырдьахаанап суруйуутугар Саха тыйаатырын номоххо киирбит испэктээкилэ – «Үс саха төрүөҕэр» дьүһүйүүтүн түмүгүн;

Суруйааччы Иннокентий Сосин төрөөбүтэ 95 сылынан «Ымыы сымыыта», «Бүтэһик таба», «Хара мэҥ», «Тойон ыҥырыа» диэн булт уонна сиэр-майгы туһунан кэпсээннэрин;

Аан дойдуну атыйахтаах уулуу аймаабыт Аҕа дойду Улуу сэриитин сылларыгар туох-туох буолбатаҕай? Саха саллаатыгар ийэтэ тикпит кээнчэтэ тиийбитин туһунан Наталия Руфова «Портянка из зайца» кэпсээнин;

Поэт М.Н.Тимофеев-Терешкин төрөөбүтэ 140 сылынан «Күлүккүт үлүннүн, күрүөҕүт кытааттын…» диэн араас сыллааҕы хоһооннорун;

Аныгым кэм поэтессалара Кэрэмэс Кийиитэ «Таптал эрэ тулабытын сырдатыахтын…» уонна Марина Комарова «Саргылаах санаалаах саха дьахтара…» хоһооннорун бөлөҕүн;

Суруйааччы Александр Амбросьев-Сайылык Уола Үлэ Дьоруойа Владимир Африканович Михайлов туһунан репортаж ыстатыйатын;

Дьокуускай куорат аныгы сэбэрэтин дьүһүйбүт архитектор Иван Шишигинныын сэһэргэһиини;

Саха Ромеолаах Джульеттатын – Лоокуут уонна Ньургуһун тустарынан киинэни оҥорбут айар бөлөх тугу саныырын;

Саха поэттарын тылбаасчыттара нуучча бөдөҥ поэта Анатолий Ольхон төрөөбүтэ 120 сылынан суруналыыс Роман Попов ыстатыйатын;

Норуот суруйааччылара Баһылай Харысхал уонна Ойуку бөдөҥ литературовед Дора Васильева туһунан ахтыыларын.

Күн – сири, «Чолбон» – саханы сырдатар.

«Чолбон» сурунаал эрэдээксийэтэ