Ойуур баһаарыгар буруйдаах 600 тыһ. солк. ыстарааптанна

Үөһээ Бүлүү оройуонун олохтооҕо судаарыстыбаҕа 600 тыһ. солк. ыстараабы төлүүргэ күһэлиннэ. Быйыл сайын кини улахан ойуур баһаара турбутугар буруйданар.

СӨ Борокуратууратын чахчыларынан, 2024 сыл бэс ыйыгар Муоҕан диэн сир учаастагар уот турбут. Ойуур баһаара тахсыбыт. Ол түмүгэр 33 гектар иэннээх сир уокка былдьаммыт. Буруйдааҕы булбуттар. Олохтоох эр киһи буолара биллибит. Куттал суох буолуутун быраабылатын аахайбакка, кини тыаҕа чугас аһаҕас уоту оттубут.

Быһылаан тахсыбытын кэннэ эр киһиэхэ холуобунай дьыала тэрийбиттэр. Буруйдаах баһаарга билиммит уонна хоромньу сууматын толору төлүүргэ эрэннэрбит. Ол эрээри, судаарыстыба ойуур баһаарын умуруорууга ороскуоттаабыт үбү-харчытын толуйбатах. Борокуратуура суукка ирдэбил биэрбит. Ол түмүгэр эр киһиттэн  ыстараап харчытын  баан счетуттан уһулбуттар.