Ойуур баһаарыгар туох кутталы үөскэтэрий?

Саха сиригэр балаҕан ыйын 22 күнүгэр баһаартан кутталлаах сезон дьиҥ таһымнаахтык сабыллыбыта. Онон сибээстээн, Россельхознадзор Саха сиринээҕи управлениета ойуурга уот туруутугар сыһыаннаах иһитиннэриини оҥордо.

Ол курдук, управление салайааччытын солбуйааччы Татьяна Попова бэҕэһээ СӨ Экологияҕа, айылҕаны туһаныыга уонна ойуур хаһаайыстыбатын уопсастыбаннай сэбиэтигэр кыттан, бэрт интэриэһинэй, киһини толкуйдатар чахчылары аҕалла.

Ол курдук, быйылгы сезоҥҥа ойуур пуондатын сиригэр-уотугар 400 ойуур баһаара тахсыбыт. Итинтэн, тыа хаһаайыстыбатыгар аналлаах сиртэн уот ойуурга барыыта 28 түгэнэ бэлиэтэммит.

Туһааннаах управление сыл ахсын ыам ыйыттан көһө сылдьан чинчийиилэри ыытар эбит. Ол эбэтэр тыа хаһаайыстыбатыгар аналлаах сир учаастактары бэрэбиэркэлииллэр. Кинилэр бу чинчийиилэригэр Арассыыйа ЫБМ Саха Өрөспүүбүлүкэтигэр киин управлениетын үлэһиттэрин кытыннаралар.

— Быйыл уопсайа 5000 гектар иэннээх 166 сир учаастагын чинчийдибит (былырыын 211 этэ). Маны 13 оройуоҥҥа уонна Дьокуускай куоракка ыыттыбыт. Бу бэрэбиэркэлээбит учаастактарбытыттан сэтиэнэҕинэн саба үүммүт уонна туһаныллыбат 143 учаастак баара билиннэ. Бу сирдэртэн 85 бырыһыана ойууру кытта быысаһар, ол эбэтэр тыаҕа уот туруутугар кутталы үөскэтэр. Отунан саба үүммүт 22 учаастагы  ким да бас билбэт эбит. Бу чинчийии түмүгүн болҕомтоҕо ылалларыгар ЫБМ сирдээҕи-уоттааҕы управлениетыгар уонна СӨ Тыатын хаһаайыстыбатын уонна ас-үөл бэлиитикэтин министиэристибэтин оробуочай бөлөҕөр ыыттыбыт, — диэтэ Россельхознадзор Саха сиринээҕи управлениетын салайааччытын солбуйааччы Татьяна Попова.