Ойуур баһаарын умулларыыга уонна халааны бохсууга үлэлиир доброволецтарга — иккис сүлүөт

Ыам ыйын 5 күнүгэр Үс Хатыҥҥа бэйэлэрин баҕаларынан ойуур баһаарын умулларыыга уонна халааны бохсууга үлэлиир доброволецтар иккис сүлүөттэрэ ыытыллыаҕа.

Ыксаллаах быһыы-майгы сулууспаларын исписэлиистэрэ баһаарыы бохсуу, умулларыы үлэтигэр былаас уорганнара бииргэ үлэлээһиннэрин хайысхаларын билиһиннэриэхтэрэ, ыксаллаах кэмҥэ ыытыллар үлэҕэ ханнык-туох быһаарыыны ылынарга,  анал тиэхиньикэни баһылааһыҥҥа, бастакы көмөнү оҥорууга уо.д.а. сүбэни биэриэхтэрэ, үөрэтиэхтэрэ.

Сүлүөтү тэрийээччилэр — СӨ Нэһилиэнньэҕэ куттал суох буолуутун хааччыйар судаарыстыбаннай кэмитиэт, Ыччат уонна социальнай коммуникациялар министиэристибэлэрэ. Маны тэҥэ, ЫБМ министиэристибэтэ, Салгын аалынан ойууру харыстааһын” ГБУ, «Якутлесресурс» ГАУ, баһаарынай сулууспа, катастрофа мэдиссиинэтин өрөспүүбүлүкэтээҕи киинэ, “РФ Красный Крест» эрэгийиэннээҕи салаата, уо.д.а.

Суолталаах тэрээһиҥҥэ кыттыыны ылыахтара — «Спецназ Добра», «Быыһааччы” (Спасатель), СӨ волонтердары кытта үлэ киинэ уо.д.а. социальнай тэрилтэлэр.