Ойуур баһаарын умуруорууга уонна халаан уутун содулларын туоратыыга доброволецтар иккис сүлүөттэрэ саҕаланна

Бүгүн, ыам ыйын 5 күнүгэр, Дьокуускай куоракка Үс Хатыҥҥа айылҕа баһаарын умуруорууга уонна халаан уутун содулларын туоратыыга баҕа өттүнэн кыттааччылар (доброволецтар) иккис сүлүөттэрэ саҕаланна.

Сүлүөт киэһэ хойукка диэри буолуоҕа. Тэрээһиҥҥэ өрөспүүбүлүкэ бары улуустарыттан 200-кэ кыттааччы кэллэ.

Тэрээһин үөрүүлээх түгэнин арыйарыгар СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников араас быһылааннар, айылҕа алдьатыылаах иэдээннэрэ, халаан, ойуур баһаара тахса турар кэмнэригэр, бу хамсааһын нэһилиэнньэҕэ  ордук  көмөлөөҕүнэн, өрөспүүбүлүкэ салалтатын өттүттэн өйөнүллүөхтээҕин  эттэ.

«Бүгүн көрөрбүт курдук сүлүөккэ кыттааччы элбээбит. Онон эһиил маннык сүлүөтү зоналарынан араартаан, илин эҥээр, Бүлүү бөлөх диэн тэрийиэхпит. Бүгүн алта салаанан баҕа өттүнэн кыттааччылары ыксаллаах  быһыы-майгы тахсар түгэнигэр, айылҕа алдьатыылаах иэдээннэрин туоратыыга  үөрэтиэхтэрэ. Ол курдук, бастакы көмөнү оҥорууну, тиэхиньикэни, о.д.а. инструменнары хайдах сөпкө туһанары көрдөрүөхтэрэ. Мантан киэһэ ыччат күрэхтэһиэ, ыллыа-туойуо, түмсүө», — диэн санаатын үллэһиннэ.

Оттон СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков биһиги курдук ыксаллаах быһыы-майгы эйгэтигэр үлэлии сылдьар дьоҥҥо баҕа өттүнэн көмөлөһөр дьон бааллара, кинилэр күүстэрэ-кыахтара, тирэхтэрэ олус суолталаах диэтэ.

«Доброволецтар биһиэхэ 2021 с. ойуур улахан баһаара тахсыбытыгар көмөлөспүттэрэ, ону таһынан кинилэр атын даҕаны көрдүүр-быыһыыр тэрээһиннэргэ кытталлар. Бүгүҥҥү тэрээһин кинилэр өссө бэлэмнээх буолалларыгар төһүү буолуо уонна биһигини кытары салгыы бииргэ үлэлиир кыаҕы биэриэ», — диэтэ Дмитрий Лепчиков.

Сүлүөт Саха Өрөспүүбүлкэтин Бырабыыталыстыбатын өйөөһүнүнэн ыытылынна. СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт уонна Ыччат дьыалаларыгар министиэристибэтэ уонна Ыксаллаах быһыы-майгы министиэристибэтэ тэрийдилэр.

Тэрээһиҥҥэ  Ыксаллаах быһыы-майгы министиэристибэтин кылаабынай управлениета, Гражданскай оборуонаҕа, нэһилиэнньэни уонна сири-уоту көмүскээһиҥҥэ, айылҕа алдьатыылаах иэдээннэриттэн, киһи дьайыытын түмүгэр тахсар алдьархайдартан, баһаардартан куттал суох буолуутун хааччыйыыга управлениета, СӨ Айылҕаны туһаныы уонна ойуур хаһаайыстыбатын министиэристибэтэ, «Ойуур харыстабылын авиацията», «Якутлесресурс», Быыһыыр сулууспа, СӨ баһаары утары судаарыстыбаннай сулууспа, СӨ волонтердары кытта үлэҕэ киин, «Кыһыл кириэс» уопсастыбаннай тэрилтэ Саха сиринээҕи салаата, устудьуоннар этэрээттэрэ, Саха сирин добровольческай ыстааба, уо.д.а.

Сүлүөт сүрүн чааһынан идэлээх үлэһиттэр: быыһааччылар, баһаарынайдар, ойуур үлэһиттэрэ, о.д.а. исписэлиистэр сатабылы, булугас өйү, тулууру, дьулууру көрдөрөр үөрэхтэри, быыһыыр үлэлэр сүрүн тутулларын көрдөрдүлэр, маастар-кылаастары ыыттылар.