Ойуур баһаарын умуруорууга үһүс салгын аала кэлиэхтээх

Бе-200 үһүс салгын аала Саха сиригэр ойуур уотун умуруорууга үлэлии бу күннэргэ кэлиэхтээх.

Бу туһунан Ил Дархан Айсен Николаев ойуур баһаардарын утары охсуһар ыксаллаах быһыы-майгы хамыыһыйатын мунньаҕар эттэ. Уу кутар тэриллээх салгын аалын уустук балаһыанньалаах улуустарга ыытан үлэлэтиэхтэрэ.

«Ойуур баһаардарынан КЧС мунньаҕын ыытылынна. Абый, Өлүөхүмэ, Бүлүү, Үөһээ Бүлүү, Дьааҥы улуустара уустук балаһыанньалаахтар», — диэн Ил Дархан бэйэтин ТГ-ханаалыгар суруйар.

«Бу күннэргэ Бе-200 амфибия салгын аала кэлэн уустук балаһыанньалаах улуустарга үлэлиэхтээх. Билигин сүрүн сорукпут — нэһилиэнньэ олоҕор-дьаһаҕар, доруобуйатыгар куттал суоһуо суохтаах. Уоту умуруорууга үлэ салҕанар», — диир  Айсен Николаев.

Саха сиригэр билигин икки Бе-200 салгын ааллара Үөһээ Бүлүү уонна Абый улуустарыгар үлэлииллэр.