«Ойуур» көс­түүмү айбыт иһирэх ийэлэр, эбээлэр

Байыаннай дьайыы кыттыылаахтарын сэргэ тыылга кыайыыны уһансааччы волонтердарбыт туһунан  кэпсиирбит хайаан даҕаны наада. Кинилэр биир да күн өрөөбөккө, ыалдьары, сылайары умнан, байыаннай дьайыыга сылдьар уолаттарбытыгар көмөлөһөллөр.

 

Сомоҕо күүс

Мин бүгүн «Бары бииргэ — биир сомоҕо!» диэн волонтер иистэнньэҥнэр түмсүүлэрин туһунан кэпсиэхпин баҕарабын. Бу түмсүү туһунан байыаннай дьайыыга сылдьар уолаттар уоппускаҕа кэлэ сылдьан суруйарбар көрдөспүттэрэ. Хаста эмэ төхтүрүйэн, көрсөн кэпсэтэргэ болдьоһон баран, дьэ тиийэ сырыттым. Дьокуускай куорат Бааһынай ырыынагын дьиэтин иһигэр икки кыракый хоско бааллар эбит. Олус кыараҕастык да олордоллор, улахан көмөнү оҥороллорун көрөн сөхтүм.

Түмсүүнү Аллайыаха улууһун Чокуурдаах бөһүөлэгиттэн төрүттээх Римма Моисеевна Бережнева уонна Сардаана Николаевна Лебедева тэрийбиттэр.

Ураты таҥастар

Кыраттан саҕалаан баран, билигин бэйэлэрэ айбыт «Ойуур» дьыл кэминэн өҥө уларыйар таҥастары, антидроновай былаастары, суорҕаннары, наһыылкалары, кээнчэлэри тигэллэр, наскылары баайаллар, харысхаллары оҥороллор. Элбэх уол кэлэн «Ойуур» көстүүмнэри сакаастыылларын этэллэр, онуоха төһө кыайалларынан көмөлөһө сатыыллар, ол эрээри матырыйаал тиийбэтэ хааччахтыыра биллэр. Бу көстүүм дьыл кэминэн кыһыҥҥы, сайыҥҥы уонна күһүҥҥү диэҥҥэ арахсар. Сайыҥҥы көстүүм от күөх хараҥата, от-мас өҥүн курдук, кыһыҥҥы хаары кытары хаар курдук маҥан, оттон күһүҥҥү арыый хараҥа, бадарааны, хара сири кытары тэҥнээх өҥнөөхтөр. Оттон антидроновай былаас-накидкалара былаас курдук кэтиллэрин таһынан, наһыылка, мастан маска тардыллар бүрүө, ону тэҥэ тымныыттан харыстыыр суорҕан буолуон сөп. Элбэх уол дронтан хаххаланан тыыннаах хаалбыттарын туһунан кэпсээн, махтал тылларын этэллэр.

 

Кыраттан саҕалаан баран, билигин бэйэлэрэ айбыт «Ойуур» дьыл кэминэн өҥө уларыйар таҥастары, антидроновай былаастары, суорҕаннары, наһыылкалары, кээнчэлэри тигэллэр, наскылары баайаллар, харысхаллары оҥороллор.

 

Соторутааҕыта биир атаҕын эчэппит байыас торуоска ыла кэлэ сылдьан, антидроновай суорҕан быыһаабытын кэпсээбит. Аһаҕас сиргэ байыас үрдүнэн икки дрон көтөн кэлбит. Байыас ханна да барар кыаҕа суох эбит. Дьэ онно үрүсээгэр былаас баарын өйдөөн кэлэн, кэтэҕинэн субуйа тардан бүрүммүт. Инньэ гынан хаххаланан, дроннар булбакка, эргийэ түһэн баран төттөрү көппүттэр. Онон эһиги суорҕаҥҥыт быыһаан тыннаах хаалбытым диэн байыас махтал тылларын этэн барбыт.

Бачча элбэх араас суол таҥаһы тигэргэ, харысхаллары оҥорорго матырыйаалга элбэх үп барара биллэр. Римма Моисеевна кэпсииринэн, 2023 сыллаахха социальнай ситимҥэ сураҕа суох сүппүт уонна өлбүт буойуннар төрөппүттэрин бөлөҕүн тэрийбиттэр. Онно биирдэ харчы хомуйуутун биллэрэ сылдьыбытын кэннэ, дьон бэйэтэ көмөлөһөн барбыт. Аллайыаха, Муома улуустарын үтүө санаалаах олохтоохторо көмөлөрө улаханын бэлиэтииллэр. Муома уонна Анаабыр улуустарын дьаһалталара матырыйаалларын бэйэлэрэ атыылаһан аҕалан антидроновай былаас-суорҕаннары тиктэрэн илдьибиттэр. Улуустар кинилэр холобурдарын батыһан, тиктэриэхтэрин сөп эбит.

Бу күннэргэ Дьокуускай куоракка өрөспүүбүлүкэтээҕи балыыһаҕа эмтэнэ сытар байыастарга Илизаров аппараатыгар бүрүө таҥас тикпиттэр. Уолаттар ону кэтэн, махталлара улахан. Волонтер Ульяна Матвеева бу курдук кэпсиир: “Быраатым байыаннай дьайыыга барыаҕыттан кинилэри кытары билсэбин, иллэҥ кэммэр кэлэн көмөлөһөбүн. Элбэх уол кэлэн таҥас ылар. Быраатым госпитальга сыттаҕына элбэхтэ сырыттым. Онно көрдөхпүнэ, ханнык даҕаны эрэгийиэн маннык таҥас тигэн уолаттарыгар көмөлөспөт эбит. Эчэйбит уолаттар Илизаров аппараатын аһаҕас илдьэ сылдьаллар, оттон биһиэннэригэр хахтары тигэн ыытабыт”.

 

Үтүө дьон үтүөтэ умнуллубат

Мин сылдьарбар бу түмсүү Далбар хотуттара кып-кыараҕас сиргэ, биир кыракый түөрэҥнии турар остуолга үлэлии олороллоро. Таҥастарын чараас икки паньыараны бэйэ-бэйэтигэр скотчунан холбоон баран, эриллибит матырыйааллары атах оҥорон, тэлгээн быһаллар. Ол кэннэ ону хомуйан баран, онно иистэнэр массыыналарын уураллар. Биир эмэ үтүө санаалаах киһи, тэрилтэ баар буоллаҕына, теннис остуолун курдук хомуллар остуолунан уонна киэҥ-куоҥ соҕус хоһунан хааччыйара буоллар, өссө элбэх уолга күүс-көмө буолуо этилэр.

Түгэнинэн туһанан, «Бары бииргэ — биир сомоҕо!» түмсүү волонтердара «Туймаада» ФАПК генеральнай дириэктэрэ, “Cайсары” ырыынак салайааччыта Петр Ефремовка уонна дьаһалтатыгар, ырыынак атыыһыттарыгар байыаннай дьайыы кыттыылаахтарыгар көмөлөрүн иһин барҕа махталларын тиэрдэллэр. Итини таһынан, байыаннай дьайыы кыттыылаахтарын чугас дьонноро, өрөспүүбүлүкэ үгүс олохтоохторо көмөлөһөллөр, кинилэри үүммүт Саҥа сылынан эҕэрдэлииллэрин уонна сэрии бүтэн эйэлээх олох кэлэрин баҕараллар. Байыаннай дьайыы бүтүөр диэри уолаттарбытыгар көмөлөһөр аналлаахпыт, онон таҥастары тигэргэ матырыйааллары атыылаһарга син биир көмө наада. Амарах сүрэхтээх, үтүө дууһалаах дьон көмөлөһүөхтэрэ диэн эрэнэллэрин этэллэр.

 

САНАА

Римма Бережнева, «Бары бииргэ — биир сомоҕо!» диэн волонтер иистэнньэҥнэр түмсүүлэрин салайааччыта:

— 2022 сыллаахха байыаннай дьайыы саҕаламмытыгар, араас хамсааһыннарга сылдьан, ким хайдах көмөлөһөрүн, тугу гынарын көрбүтүм. Уолум 2023 сыллаахха хантараак баттаһан барбыт кэмигэр биир дойдулаахпын Сардаана Николаевна Лебедеваны көрсүбүтүм. Кини уола эмиэ онно сылдьар эбит этэ. Кэпсэтэн, сүбэлэһэн баран, уолаттарга көмөлөһөр хамсааһыны тэрийэн, Бааһынай ырыынагын дьиэтигэр миэстэ булбуппут. Ол иннинэ дьиэбэр бэйэм матырыйаал атыылаһан наһыылка тигэрим. Аадырыстаах баһыылкалары Аллайыахам улууһа ыытар буолбута, күүскэ көмөлөспүтэ. Онтон ыла күүстээх үлэбитин саҕалаабыппыт. Сыл аайы дьон түмсүүбүтүгэр кэлэн көмөлөһөр буолбута. Билигин сүрүн үлэлиир уонча киһи, Аллайыаха, Муома, Сунтаар, Өлүөхүмэ, Мэҥэ Хаҥалас, Кэбээйи улуустарыттан бааллар. Сорохтор бэйэлэрэ үлэлээхтэр, биир устудьуон оҕолоохпут, бары кэлэн көмө буолаллар. Билигин Владивосток уонна Хабаровскай госпиталларыгар сытар уолаттарга көмөлөһөбүт. Хас ый аайы кэлээскэлэри, баттыктары, памперстары, аһы-үөлү хомуйан ыытабыт.

Сайаана Львова
Хаартыскалар: «Бары бииргэ – биир сомоҕо!» түмсүү тус архыыбыттан