Ойуур уотун 1 886 киһи умуруорар

Ойуур уотун 1 886 киһи умуруорар, 182 тиэхиньикэ туһаныллар.

Бүгүн, от ыйын 27 күнүгэр, СӨ ЫБМ кылаабынай управлениетын начаалынньыгын солбуйааччы Григорий Колданов бэрэссэдээтэллээх СӨ Ыксаллаах быһыыны-майгыны сэрэтэр, туоратар уонна баһаартан куттал суох буолуутун хааччыйар суһал ыстаап хамыыһыйатын мунньаҕа буолла.

Улуустарга ойуур баһаардарынан балаһыанньа тыҥааһыннаах. Өрөспүүбүлүкэ сиригэр-уотугар ураты баһаарынай эрэсиим салҕанар.

Суһал ыстаап мунньаҕар ойуур баһаардарынан Үөһээ Бүлүү, Дьааҥы, Кэбээйи, Өлүөхүмэ, Горнай, Бүлүү, Сунтаар улуустарыгар балаһыанньаны иһиттилэр. Хас баһаар баарын, умуруорууну, эбии күүстэри ыҥырыыны, ол иһигэр олохтоох нэһилиэнньэни кытыннарыыны уонна бу күннэргэ былааннары билистилэр.

Бүгүҥҥү күн туругунан 22 улууска 117 ойуур баһаара уонна 1 ландшафтнай баһаар бэлиэтэнэр. 61 баһаары умуруорууга үлэ ыытыллар. Уоту 1 886 киһи умуруорар, 182 анал тиэхиньикэ туһаныллар. Уопсайа 25 тыһ. тахса га иэннээх сири хаппыт алта баһаар бохсуллубут. Суукка саҕаланыаҕыттан 21 га иэннээх сиринэн тайаабыт биир баһаар умуруоруллубут.

Суһал ыстаап мунньаҕар зондировщик салгын ааллара көтөргө бэлэм тураллара бэлиэтэннэ.

Бүгүҥҥү күҥҥэ ыксаллаах быһыы-майгы эрэсиимэ Абый, Бүлүү, Дьааҥы, Үөһээ Бүлүү, Горнай, Ленскэй, Уус Маайа, Өлүөхүмэ улуустарыгар салҕанар.

СӨ Ил Дарханын уонна Бырабыыталыстыбатын пресс-сулууспата