Ойуурга баһаар куттала үрдүүр

Бэс ыйын 11-12 күннэригэр Алдан улууһун илин, Мэҥэ Хаҥалас, Нам улууһун өттүгэр, Дьокуускай куоракка уонна ол тулатыгар IV кылаастаах ойуур баһаара тахсыан сөптөөх кутталлааҕын биллэрдилэр.

Өймөкөөн улууһугар олус үрдүк V кылаастаах, Үөһээ Халыма улууһугар IV кылаастаах баһаар куттала турар.

Өрөспүүбүлүкэҕэ ойуур баһаарын таһаарбат туһугар баһаары утары ураты эрэсиим биллэриллибитэ. Санатан эттэххэ, баһаары утары ураты эрэсиим биллэриллибит кэмигэр дьон кэлимсэ тыаҕа тахсара бобуллар.

СӨ ЫБММ кылаабынай управлениета куттал суох буолуутун быраабылатын дьон булгуччу тутуһара ирдэнэрин санатар. Бу туһунан туһааннаах министиристибэ телеграмыгар суруйаллар.