Окко 1,6 тыһ. тахса звено таҕыста

Өрөспүүбүлүкэҕэ сүөһү аһылыгын бэлэмниир хампаанньа саҕаланна. От ыйын 17 күнүнээҕи туругунан, 1619 звенонан 4,5 тыһыынчаттан тахса киһи оттуу тахсыбытын туһунан өрөспүүбүлүкэ тыатын хаһаайыстыбатын уонна ас-үөл бэлиитикэтин миниистирэ Артем Александров иһитиннэрдэ.

«Күн бүгүн өрөспүүбүлүкэ үрдүнэн 527 механизированнай, 633 аҥара механизированнай, 24 ат-илии   уонна 435 илиинэн үлэлиир звенолар сүөһү аһын бэлэмнииллэр, 2 тыһыынчаттан тахса тыраахтар үлэлиир», — диир Артем Александров.

Бу күн туругунан, 8860 гектар иэннээх от охсуллубут, 3839 туонна от кэбиһиллибит. Быйыл бары  хаһаайыстыбалар 434 334 туонна оту, 13443 туонна сенаһы уонна 24184 туонна сиилэһи бэлэмниир былааннаахтар.

Саамай элбэх оту Мэҥэ Хаҥалас (44369 т) уонна Чурапчы улуустартара (39890 т) бэлэмниэхтэрэ.

Сунтаар улууһа 34 тыһыынча туонна оту бэлэмниир былааннаах, Таатта – 32662 туоннаны, Хаҥалас уонна Уус Алдан – 31-дии тыһыынча туоннаны, Амма – 30653 туоннаны, Ньурба – 29683 туоннаны, Нам – 27533 туоннаны, Үөһээ Бүлүү – 24343 туоннаны, Бүлүү — 23182 туоннаны оттуохтара.

Өлүөхүмэ улууһун былаана 14 290 т., Горнай былаана — 11 881 т., Кэбээйи былаана — 10 274 т.

Дьокуускайга 9202 т. окко, Дьааҥыга — 8788 т., Томпоҕо — 5452 т., Ленскэйгэ — 5722 т, Орто Халымаҕа 5 тыһ. т. окко сөп буолар.

Өймөкөөн улууһугар 3660 т., Эбээн Бытантайга 2501 т., Усуйаанаҕа – 1928 т., Абыйга — 1968 т., Алдаҥҥа – 1700 т., Муомаҕа 1141 т. кытаанах аһылыкка наадыйаллар.

Барыллаан дааннайынан, быйыл 400,5 тыһыынча туонна (былаантан 92%) от оттонуохтаах. Ходуһалар ууга барбыттарынан, Өймөкөөн, Муома уонна Томпо улуустарыгар сүөһү аһын бэлэмнииргэ уустук балаһыанньа буолла. Күн бүгүн сезоннай тыа хаһаайыстыбатын үлэтин ыйарга-кэрдэргэ Тыа хаһаайыстыбатын министиэристибэтин суһал ыстааба үлэлиир, диэн иһитиннэрэр Ил Дархан, бырабыыталыстыба пресс-сулууспата.