Оксана Чикачева: «Алдан мин үөрэнээччилэрбинэн киэн туттарыгар баҕарабын»

СӨ үөрэҕириитин үтүөлээх үлэһитэ, РФ уопсай үөрэхтээһинин бочуоттаах үлэһитэ М.К.Петрова аатынан, Аҕа дойду Улуу сэриитигэр Кыайыы 80 сылыгар аналлаах “Кылаас салайааччыта-2025” идэ маастарыстыбатын өрөспүүбүлүкэтээҕи III күрэһин кыайыылаахтарын аата билиннэ.

Өрөспүүбүлүкэтээҕи “Кылаас салайааччыта-2025” күрэс кыайыылааҕынан Алдан куорат биирдиилээн биридимиэттэри чиҥэтэн үөрэтэр оскуолатын нуучча тылын уонна литэрэтиирэтин учуутала, 5 “Б” уонна 7 “Б” кылаастар салайааччылара Оксана Чикачева таҕыста.

— Оксана Дмитриевна, оскуолаҕа үлэлээбитиҥ ыраатта дуо?

— Оскуолаҕа үлэлээбитим 22 сыл буолла. Чопчу Алдан оскуолатыгар 8 сыл учууталлаатым. Ол иннинэ Новосибирскай уобаласка үлэлээбитим, онтон төрүттээхпин.

— Тыый! Саха сиригэр хайдах кэлэн хааллыҥ?

— Кэргэним Алдаҥҥа баахтабай ньыманан үлэлээбитэ. Үлэлиир хампаанньата Алдан улууһугар көспүтэ, кини манна бастайааннай үлэҕэ киирэн, аҕабытын батыһан дьиэ кэргэнинэн Алдаҥҥа көһөн кэлбиппит. Оннук олохсуйан хааллыбыт.

— Бу иннинэ күрэскэ кытта сылдьыбытыҥ дуо?

— Биллэн турар, бу кэм устата араас күрэстэргэ кыттан турабын. 2018 сыллаахха “Сердце отдаю детям” күрэс улуустааҕы түһүмэҕэр, “Сыл учуутала” күрэс муниципальнай түһүмэҕэр (Новосибирскай) кыттыбытым, “Көмүстээх Алдан учуутала” улуустааҕы күрэскэ миэстэлэспитим, иллэрээ сыл биир идэлээхпин кытта “За нравственный подвиг учителя” эрэгийиэннээҕи күрэс кыайыылааҕынан буолбуппут. Ити курдук, “Кылаас салайааччыта” күрэскэ балачча тэрээһиннэргэ кыттан кэллим. Ситиһии тута кэлбэтэ биллэр, уопут эмиэ ирдэнэр.

Чуолаан бу күрэскэ “Сердце отдаю детям” өрөспүүбүлүкэтээҕи күрэс улуустааҕы түһүмэҕэр “Кылаас салайааччыта” номинациятыгар бастаабытым. Онон салгыы кытын диэн этии киллэрбиттэрэ.

— Күрэс туһунан тус санааҥ?

— Күрэскэ кыайыы туһугар кэлбэтэҕим. Бэйэм сатабылбын үллэстэр, атыттартан үөрэнэр соруктаах кыттыбытым. Саха сиригэр махталым улахан, учуутал быһыытынан Саха сиригэр сайынным, үүннүм. Бу күрэһи иилээн-саҕалаан ыытар Үөрэҕи сайыннарар уонна идэ таһымын үрдэтэр институкка махтанабын. Бу, учуутал эрэ быһыытынан буолбакка, киһини личность быһыытынан сайыннарар күрэс. Бу истиҥ, эйэҕэс күннэр хаһан да умнуллуохтара суоҕа. Финалга тахсыбыттар төһө да күрэстэһэ сырыттарбыт, бэйэ-бэйэбитин өйөстүбүт, көмөлөстүбүт, онон күрэстэһэ сылдьар курдук санамматыбыт. Аҕыйах күн иһигэр бииргэ түмүсэн ыллыбыт, доҕордостубут.

Маргарита Константиновна Петрова дьиэ кэргэнин аатыттан муҥутуур кыайыылаах бирииһин тутар, эҕэрдэ тыллары истэр олус долгутуулаах этэ. Күрэс кэнниттэн сыанаҕа туран салгыы тугу гынабын диэн толкуй киирэр. Бу хоруйун билэбин. Уопуттаах учууталбын, бүгүн өрөспүүбүлүкэтээҕи күрэс кыайыылааҕынан буоллум. Бүгүн: “Алдан эйигинэн киэн туттуо” – диэн элбэхтик эттилэр. Ол эрээри, тус бэйэм Алдан мин үөрэнээччилэрбинэн киэн туттуон баҕарабын. Ол аата мин кылаас салайааччытын быһыытынан үөрэнээччилэрбэр, кинилэр олоххо бэлэмнээх, дьоһуннаах дьон буола үүнэн тахсалларын туһугар өссө да элбэҕи иҥэриэхтээх, сирдиэхтээх, иитиэхтээх эбиппин, — диэн санаатын этэр.

“Кылаас салайааччыта-2025” өрөспүүбүлүкэтээҕи күрэс 1 истиэпэннээх дипломунан Василиса Валерьевна Неустроева (Амма улууһун Эмис оскуолатын аангылыйа тылын учуутала), 2 истиэпэннээх дипломунан Валентина Валентиновна Пахомова (Дьокуускай куорат 20-с нүөмэрдээх оскуолатын алын кылааһын учуутала), Виктория Алексеевна Олесова (Хаҥалас улууһун Булгунньахтаах оскуолатын аангылыйа тылын учуутала), 3 истипиэннээх дипломунан Мария Дмитриевна Филиппова (Мэҥэ Хаҥалас улууһун В.П.Ларионов аатынан Майа оскуолатын аангылыйа тылын учуутала), Жанетта Алексеевна Егорова (Үөһээ Бүлүү 2-с нүөмэрдээх оскуолатын алын кылааһын учуутала) наҕараадаланнылар.