Октябрина Афанасьева «Саха сирэ – дьоруойдар дойдулара» каадыр бырагырааматынан стажировка ааста

«Саха сирэ – дьоруойдар дойдулара» каадыр бырагырааматынан анал байыаннай дьайыы кыттыылаахтара, бэтэрээннэрэ үөрэнэн, билигин министиэристибэлэринэн, биэдэмэстибэлэринэн сылдьан стажировка бараллар.

Бу күннэргэ бырагыраама кыттыылааҕа Октябрина Афанасьева СӨ Психотерапевтическай киинигэр (ЯРПНД) стажировкатын түмүктээтэ.

Октябрина Семеновна – Кэтти Марсден аатынан Бүлүү улууһун кырдьаҕастарга уонна инбэлииттэргэ социальнай хааччыйыы анал дьиэтин уопсай боппуруостарга дириэктэри солбуйааччы. Кини анал байыаннай дьайыыга кыттыыны ылбыта уонна «Гражданскай килбиэн» диэн бэлиэнэн наҕараадаламмыта.

Стажировкатын кэмигэр кини Психотерапевтическай киин, күнүскү стационар отделениетын, «Аҕа дойду көмүскээччилэрэ» судаарыстыбаннай пуонда мэдиссиинэ психологын үлэтин кытта билистэ. Тэрилтэ исписэлиистэрэ отделениeларга үлэ хайдах тэриллибитин сиһилии кэпсээтилэр, тус-туһунан уонна бөлөхтөөн үлэлэр хайдах ыытыллалларын көрдөрдүлэр. Анал байыаннай дьайыы кыттыылаахтарыгар уонна кинилэр дьиэ кэргэттэригэр мэдиссиинэ-психологическай көмөнү оҥоруу хайдах барыахтааҕын туһунан толору иһитиннэриини биэрдилэр. Көмө көрдөөн кэлбит анал байыаннай дьайыы кыттыылаахтарын уонна кинилэр дьиэ кэргэннэрин уйулҕаларын кэһиллиитин, куттал уонна депрессивнэй туруктарын быһаарыыга түргэн диагностиканы, ПТЦ уонна күнүскү стационар усулуобуйатыгар психолокка, бырааска-психотерапевка уонна психиатрга дириҥэттиллибит көрүүгэ уонна эмтэниигэ наадыйар дьон маршрутизациятын кытта билистэ. Социальнай чөлүгэр түһэрии исписэлииһин кытта отделениe ыарыһахтарынаан быһаччы үлэлээтэ, когнитивнай кэһиллиилэри сэрэтиигэ, эмоциональнай күүрүүнү устууга, о.д.а. туттуллар ньымалары көрдө-иһиттэ.

Октябрина Семеновна, анал байыаннай дьайыыга сылдьыбыт уопуттаах киһи быһыытынан, анал байыаннай дьайыы кыттыылаахтарыгар мэдисиинэ-психологическай көмөнү уонна өйөбүлү салгыы тупсарарга бэйэтин идеяларын киин үлэһиттэрин кытта үллэһиннэ, психологическай көмөнү хайдах тупсарарга сүбэлэри биэрдэ.

«Саха сирэ – дьоруойдар дойдулара» бырагыраама профессиональнай уонна тус сайдыыга саҥа кыахтары арыйар. Психотерпевтическай киин  кэллэктиибэ Октябрина Семеновнаҕа бу бырагыраамаҕа кыттыыны ылбытынан ис сүрэхтэн эҕэрдэлиир.

Оттон Октябрина Афанасьева стажировкатын туһунан санаатын үллэстэр уонна  Дьокуускайдааҕы психоневрологическай киин үлэһиттэригэр махталын тиэрдэр.

«Стажировка кэмигэр ылбыт сыаналаах уопутум иһин Дьокуускайдааҕы психоневрологическай диспансер кэллэктиибигэр дириҥ махталбын тиэрдэбин. Кылгас кэмҥэ, мин бэйэлэрин дьыалаларын баһылаабыт, дьиҥнээх исписэлиистэри кытары билистим. Евгения Михайловна курдук эдэр исписэлиистэри кытта билсиһии, кини холку майгыта уонна дьону истэр дьоҕура эрэли үөскэттэ. Киэҥ көҕүстээх, дириҥ толкуйдаах  Алена Громова госпиталларга үлэлээбит уопута, онно биһиги бааһырбыт буойуннарбыт ыарыыларын уонна эрэйдэрин көрбүтэ, үлэтигэр эҥкилэ суох бэриниитэ мин санаабын күүһүртэ. Алтана мин дууһам айманыытын туоратарга бэлэмэ, киһиэхэ истиҥ уонна аһыныгас сыһыана сүргэни көтөҕөр. Константин, эдэр да буоллар, анал байыаннай дьайыы кыттыылаахтарын уонна кинилэр дьиэ кэргэттэрин кытта таһаарыылаахтык үлэлиир, уопутурар. Кини бу эппиэтинэстээх сыһыаныгар дириҥ ытыктабылы үөскэтэр. Биллэн турар, уопуттаах психиатр Иван Иванович Замятины, кини билиитин уонна профессионализмын сыаналаабат буолар сатаммат. Диспансерга бары бэйэ-бэйэлэрин, ыарыһахтарын кытта истиҥ сыһыаннарын, өйөбүллэрин иһин ураты махталбын этиэхпин баҕарабын. Анал байыаннай дьайыы содулларын туоратыы үлэтэ – бу аҥардас үлэ эрэ буолбатах, бу анал, ураты сыһыаны уонна дууһа тулуурун ирдиир. Эһиги уоту ортотунан ааспыт дьоҥҥо, буойуттарга, туох баар күүскүтүнэн, билиигитин ууран көмөлөһөҕүт. Ол бииргэ үлэлииргэ, ханнык баҕарар ыарахаттары туоруурга эрэли уонна итэҕэли үөскэтэр. Эһиги үлэҕит, дьыалаҕытыгар бэриниигит, аһыныгас майгыгыт – бу Дьокуускайдааҕы психоневрологическай диспансеры аҥардас мэдиссиинэ тэрилтэтинэн эрэ гыммакка, дьон эмтэниини ааһар уонна олоххо төннөр сиринэн оҥорор. Бу иһин эһиэхэ махтанабын!», — диэн Октябрина Семеновна санаатын үллэстэр.