Оленегорскай олохтоохторо байыаннай дьайыыга көмөлөһөллөр

Аллайыаха улууһун кииниттэн, Чокуурдаахтан 141 килэмиэтир тэйиччи сытар кыракый Оленегорскай нэһилиэгин олохтоохторо байыаннай дьайыыга анаан үс куул балыгы хомуйдулар.

Оленегорскай олохтоохторо билиҥҥи уустук кэмҥэ, тус үлэлэрин быыһыгар, бэйэлэрин баҕаларынан  байыаннай дьайыыга көмөлөһө олороллор. Бу хомуллубут көмө Дьокуускай куоракка «Вместе мы сила!» түмсүүгэ тиийэр, ону волонтердар салгыы  байыаннай дьайыыга ыытыахтара.

«Билиҥҥи уустук кэмҥэ күүс-көмө уонна тирэх буолар Оленегорскай олохтоохторугар, нэһилиэк баһылыгар А.К. Трофимовка, икки байыас ийэтигэр Софья Михайловнаҕа уонна Валентина Павловнаҕа барҕа махталбытын тиэрдэбит», — диэн этэр «Вместе мы сила!» түмсүү салайааччыта Римма Бережнева.

Бу курдук ыарахан кэмҥэ түмсүү, сомоҕолоһуу норуот биир санааланыытын уонна уустук кэмҥэ бэйэ-бэйэҕэ көмөҕө кэлэргэ өрүү бэлэмин көрдөрөр. Байыаннай дьайыыга көмө судаарыстыба таһымыгар эрэ буолбакка, боростуой дьон көҕүлээһининэн олоххо киирэрин, бу норуот биир тыыннаах буолуутун уонна бэйэ-бэйэҕэ көмөлөһүүтүн күүһүн туоһулуур.