Ольга Балабкина Арктика тирэх пууннарын испииһэгэр Тиксии-Найба агломерациятын киллэрии суолтатын бэлиэтээтэ

Федеральнай бырабыыталыстыба Арассыыйа Арктическай зонатыгар баар 15 тирэх нэһилиэнньэлээх пуун социальнай-экономическай сайдыыларын комплекснай былаанын бигэргэттэ, манна Саха сириттэн Булуҥ улууһун Тиксии-Найба агломерацията баар.

Бу быһаарыы Арассыыйа бэрэсидьиэнэ Владимир Путин сорудаҕынан ылылынна уонна 2035 сылга диэри олоххо киириэхтээх.

СӨ бырабыыталыстыбатын бэрэссэдээтэлин солбуйааччы Ольга Балабкина Арктика тирэх пууннарын испииһэгэр Тиксии-Найба муора порда киирбитэ дьоһун суолталаах диэн тоһоҕолоон бэлиэтээтэ. Бу быһаарыы эрэгийиэн инфраструктуратын сайыннарыыга, ол иһигэр аэропорду саҥардыыга уонна пуорт эбийиэктэрин чөлүгэр түһэриигэ улахан болҕомтону уонна күүһү-уоҕу эрэйэр.

Ольга Балабкина Арассыыйа бырабыыталыстыбатыгар өйөбүлүн иһин махталын биллэрдэ уонна бу быһаарыы ыччаты кытта уһуннук дьүүллэһиллибитин, элбэх ааҕыы-суоттааһын кэнниттэн быһаарыы ылыллыбытын бэлиэтээтэ.

Бу кэлимник сайыннарар ньыма Арктика эрэгийиэннэригэр туруктаах сайдыыны хааччыйыаҕа, дьон олохторун хаачыстыбатын тупсарыаҕа, маннааҕы сир-уот дойду биир кэлим экэниэмикэтин систиэмэтигэр киирэригэр көмөлөһүөҕэ, диэн иһитиннэрэр СӨ Ил Дархан, бырабыыталыстыба пресс-сулууспата.