Ольга Балабкина: «Итии лииньийэҕэ» киирэр боппуруостар уларыйдылар

Ааспыт үс нэдиэлэҕэ «Итии лииньийэҕэ» киирэр боппуруостар үксүлэрэ сүппүт докумуоннары чөлүгэр түһэрии уонна бааһырбыт дьону госпиталларга арыаллааһын туһунан буолла.  Ол туһунан бүгүн СӨ Бырабыыталыстыбатын Бэрэссэдээтэлин солбуйааччы Ольга Балабкина брифиҥ кэмигэр кэпсээтэ.

Кини бэлиэтээбитинэн, Ил Дархан Айсен Николаев дьаһалынан оҥоһуллар социальнай өйөбүл миэрэлэрэ салҕанар. Бүгүҥҥү туругунан, материальнай көмө уонна байыаннай дьайыылар кыттыылаахтарын дьиэ кэргэннэрин чилиэнин өйүүр дьаһаллар кэмигэр оҥоһуллан иһэллэр. Төлөбүрдэр эмиэ оҥоһуллаллар, ол иһин бу өттүгэр ыйытыы суох.
«Telegram бөлөҕөр кэккэ боппуруостар киирэллэр, олору биир категорияҕа холбуохха сөп. Ол үксүн байыаннай дьайыыларга сылдьар дьон дьиэ кэргэнин моральнай өттүнэн өйөөһүн буолар. Бу бөлөх аһыллыаҕыттан 10 тыһыынчаттан тахса ыйытыы киирбитэ, ол улахан аҥарын олохтоох бэйэни салайыныы уорганнара быһаардылар», – диэн кини эттэ.
Ольга Балабкина этэринэн, кэлиҥҥи кэмҥэ сүппүт докумуоннары чөлүгэр түһэриигэ уонна Москва, Ростов уонна Хабаровскай госпиталларыгар бааһырбыттары арыаллыырга боппуруос киирэр.

«Итини таһынан үгүстүк байыаннай сулууспалаахтары көрдөөн эрийэллэр. Байыаннай дьайыылар кыттыылаахтарын чугас дьонноро, аймахтара байыаннай сулууспалаах өр сибээстэспэтэҕинэ ирдэһэллэр», – диэн эбэн эттэ Ольга Балабкина.

Санатан эттэххэ, байыаннай дьайыылар буола турар сирдэригэр байыаннай сулууспалаахха куттал суоһаабатын туһуттан, суотабай сибээһинэн туһанара хааччахтанар, ол иһин өр кэмҥэ сибээскэ тахсыа суохтарын сөп.