Ольга Балабкина: Саха сиригэр байыаннай дьайыы кыттыылаахтарыгар уонна дьиэ кэргэттэригэр психологическай көмөнү оҥоруу

Байыаннай дьайыы саҕаланыаҕыттан Саха сирин Ил Дархана Айсен Николаев ыйааҕынан психологическай көмөнү оҥоруу үлэтэ тэриллибитэ.

Бүгүн уйулҕаһыт көмөтүнэн 7368 киһи хабылынна. Бу туһунан брифиҥҥэ өрөспүүбүлүкэ Бырабыыталыстыбатын бэрэссэдээтэлин солбуйааччы Ольга Балабкина иһитиннэрдэ.

“Психологтар “Абырал” санаторийга дьуһуурунайдыыллар. “Аҕа дойдуну көмүскээччилэр” судаарыстыба пуондатын филиалыгар кэбиниэт үлэлиир. Уйулҕаһыттар байыаннай госпиталларга үлэлииллэр. Уочараттаах биригээдэ Доннааҕы Ростовка баар. Байыаннай эпэрээссийэ кыттыылаахтарыгар маннык сүрүн көмөнү Ыччат министиэристибэтин иһинэн Дьиэ кэргэни уонна ыччаты өйүүр социальнай-психологическай киин ыытар», — диэтэ вице-премьер.

Психологическай көмөнү ыларга “итии линияҕа”  122 нүөмэргэ эрийиэххитин сөп. Ону тэҥэ 8-800-100-3550 суукканы эргиччи босхо линия үлэлиир.

Ону тэҥэ байыаннай дьайыыттан мобилизацияланан кэлбит дьоҥҥо уонна кинилэр дьиэ кэргэттэригэр көмөлөһүү салҕанар. Поликлиникаларга “күөх көрүдүөр» тэриллибит. Эмтэнэргэ тус бэйэлэригэр бырагыраама оҥоһуллар. Чөлүгэр түһэриини ааһарга тастан уонна балыыһаҕа сытан эмтэниэххэ сөп. Мэдиссиинэ көмөтүн байыаннай дьайыы 705 кыттыылааҕа уонна кинилэр дьиэ кэргэттэрин 1460 чилиэнэ ыллылар. 227 кыттыылааҕы уонна 397 чугас дьонун  доруобуйаларын чөлүгэр түһэрдилэр.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата