Ольга Балабкина: «Төрүт сокуоҥҥа киирэр көннөрүүлэргэ киһи быраабыгар кэһии суох»

Өрөспүүбүлүкэ бырабыыталыстыбатын бэрэссэдээтэлин солбуйааччы Ольга Балабкина СӨ Төрүт сокуонугар киирэр көннөрүүлэр киһи быраабын, ол иһигэр муниципальнай таһымҥа быһаччы быыбары ыытар быраап кэһиллибэтин  эттэ, диэн sakha.gov.ru иһитиннэрэр.

«Судаарыстыбаннай дуума дьокутааттара 33-ФЗ №-дээх федеральнай сокуону ылыммыттара. Онно олохтоох салайыныы өйдөбүлэ уларыйбыта. Ол түмүгэр федеральнай сокуоҥҥа көрүллүбүт бары мэктиэлэр, ол иһигэр муниципальнай тэриллиилэр баһылыктарын быһаччы куоластаан талыы СӨ Төрүт сокуонугар эмиэ баар буолуохтара. Быһаччы куолаһынан талар быраабы хаалларыы өрөспүүбүлүкэ нэһилиэнньэтин баҕа санаатыгар сөп түбэһэр», – диэн Ольга Балабкина бэлиэтээтэ. Ону таһынан, өрөспүүбүлүкэ бырабыыталыстыбатын бэрэссэдээтэлин солбуйааччы, олохтоох салайыныы туһунан федеральнай сокуонунан олохтоох салайыныы уорганнарыгар 137 боломуочуйа үлэлиирин санатан эттэ.

Билигин СӨ Төрүт сокуонугар онтон аҕыһа эрэ киирэн турар. 2003 сылтан муниципалитеттар боломуочуйаларын туһунан ыстатыйалар 162 төгүл уларыйбыттара. «Онон сибээстээн көннөрүүлэргэ олохтоох салайыныы боппуруостарын быһаарыыга уопсай боломуочуйалары быһаарар нуорма туттуллар», – диэн  Ольга Балабкина  эттэ.