Ольга Балабкина уоппускаҕа кэлэр байыастарга мэдиссиинэ көмөтүн туһунан быһаарда

Ольга Балабкина уоппускаларыгар кэлэр байыаннай дьайыы кыттыылаахтарыгар мэдиссиинэ көмөтүн оҥорууларын туһунан быһаарда.

Бу күннэргэ элбэх байыас уоппускатыгар кэлэр. Брифиҥҥэ Ольга Балабкина байыаннай сулууспалаахтарга федеральнай сокуон ирдэбилинэн мэдиссиинэ көмөтө госпиталларга оҥоһуллуохтааҕын туһунан эттэ.

«Илиҥҥи байыаннай уокурук командующайын эбээһинэһин быстах кэмҥэ толорооччу Алексей Ратищев быһаарбытынан, өрөспүүбүлүкэ сиригэр-уотугар байыаннай госпиталлар суохтарынан, дойдуларыгар  уоппускаларыгар кэлбит байыаннай дьайыы кыттыылаахтарыгар мэдиссиинэ көмөтө байыаннай чаастар сөбүлэҥнэринэн оҥоһуллар«, — диэн быһаарар Ольга Балабкина.

Суһал, уталытыллыбакка оҥоһуллуохтаах мэдиссиинэ көмөтүгэр итинник сөбүлэҥ ирдэниллибэт.

Өрөспүүбүлүкэҕэ байыаннай сулууспалаахтарга — байыаннай эпэрээссийэ кыттыылаахтарыгар уонна кинилэр дьиэ кэргэттэригэр психологическай уонна мэдиссиинэ көмөтө салгыы оҥоһуллар. Психологтар көмөлөрө ирдэнэр.

Байыаннай дьайыы кыттыылаахтарыгар уонна кинилэр дьиэ кэргэттэригэр алта тыһыынчаттан тахса психологическай көмө оҥоһуллубут. «Көмөҕө наадыйааччылар урукку нүөмэрдэргэ эрийиэхтэрин сөп: 122 «суһал лиинийэтигэр» уонна  8-800-100-3550″, — диэн этэр вице-премьер.

Байыаннай дьайыы кыттыылаахтарын дьонноругар көмөнө оҥоруу бөлөхтөргө салҕанар. «Федеральнай уонна эрэгийиэн таһымнарыгар быһаарыыны икки тыһыынча кэриҥэ киһи ирдиир. Билигин Дьокуускай военкоматынан ыҥырыллыбатах, байыаннай сулууспалаахтары кытары сибээстээх, 245 сурук көрүллэр«, — диэн иһитиннэрэр Ольга Балабкина.

СӨ Ил Дарханын уонна Бырабыыталыстыбатын пресс-сулууспата