Ольга Балабкина ыччаты кытта көрүстэ

Дьокуускайга «Работай в Якутии» диэн ыччат бэстибээлэ буола турар. Бэстибээл чэрчитинэн, ситиһиилээх урбаанньыттары, чунуобунньуктары кытта көрсүһүүлэр, үлэ дьаарбаҥкалара, квест-оонньуулар, куонкурустар, эдэр «сулустар» шоулара, аһаҕас халлаан анныгар бэчэрииҥкэ, о.д.а. тэрээһиннэр буолаллар.

Бырабыыталыстыба бэрэссэдээтэлин солбуйааччы Ольга Балабкина ыччаты кытта аһаҕас кэпсэтиигэ көрүстэ. Кини араас ыйытыыларга хоруйдаата.

— 20 сааскар эн хайдах этигиний? Эн карьераҕар олук буолбут түгэн хайдах этэй?

— Мин 20 сааспар Алданнааҕы суут сэкиритээринэн үлэлии сылдьарым, үрдүк үөрэххэ бараары бэлэмнэнэрим. Үөрэх кыһатын бүтэрбэккэ сылдьан, юстиция министиэристибэтигэр үлэлии киирбитим. 90-с сылларга министиэристибэ үлэтигэр тосту уларыйыы киирэн, докумуоннары саҥаттан оҥоруу ирдэммитэ. Бу мин үлэбэр олук буолбута диэххэ сөп.

— Ыччаты билигин тугу эрэ сөбүлээбэтэхтэринэ, туран баран хаалаллар дииллэр. Маны туох дии саныыгын?

— Бардыннар ээ, бу кинилэргэ уопут буолар. Бэйэлэрин тургутан көрөллөр. Кинилэргэ »социальнай лифт» эмиэ баар буолуохтаах. Бу маннык бэстибээллэр эмиэ көмөлөөхтөр. Биһиги саҕана олохпут «оскуола-үрдүк үөрэх-үлэ-биэнсийэ» диэн былааннаах этэ. Билигин оннук буолбатах.

— Үлэҕэр эйигин олус кытаанах, ирдэбиллээх салайааччы быһыытынан билэллэр. Оттон көннөрү олоххор эн хайдаххыный?

— Олоҕуҥ оҥкулун бэйэҥ оҥостоҕун. Ыра санааларгынан олоххун хамсатаҕын. Мин ыра санаам диэн, хайа хайыһарынан дьарыктаныахпын баҕарабын. Солом суох буолан, билиҥҥитэ ымсыыра эрэ көрөбүн. Сиэммин кытта алтыһыыттан күннээҕи дьолбун булабын. Билигин ыччаттан туох эрэ саҥаны, уратыны күүтэбит. Миигин ирдэбиллээх дииллэр эрээри, үлэһиттэн баара-суоҕа хараҕа умайарын, үлэлиэн баҕарарын ирдиибин.

— Эн үлэттэн сылайыыны, хал буолууну хайдах аһарынаҕын?

— Мин олус »курутуой» сэкиритээрдэрдээхпин. Кинилэр мин сылайбыппын, сэниэм эстибитин көрдөхтөрүнэ, »Ольга Валерьевнаны хайаҕа илдьиэххэ наада» дииллэр. Сөбүлүүр дьарыктаах буоллаххына, үлэттэн сынньаныыга, чөлгө түһүүгэ түргэнник көмөлөһөр, — диэн хоруйдаата.

Ольга Балабкина ыччакка ураты, саҥа суоллары көрдүүллэригэр, барытын биирдэ ситиһэ охсорго ыксаабаттарыгар, о.д.а. сүбэлээтэ.